DILI, 07 Abríl (TATOLI)—Sekretáriu Estadu Komunikasaun Sosiál, Expedito Loro Dias Ximenes, hateten agora daudaun Sekretaria Estadu Komunikasaun Sosiál (SEKOMS) no Teknolojia Informasaun no Komunikasaun (TIC-sigla portugés), hahú introdús utilizasaun sistema ho naran Sistema Diseminasaun Informasaun Integradu (SDII) ba mídia ofisiál ministériu sira.
Loro Dias esplika sistema Diseminasaun Informasaun Integradu nu’udár sistema online dijitál ne’ebé mak ho fasilmente públiku bele akompaña prosesu servisu sira kada ministériu nian no liuhusi sistema referidu jornalista sira bele hato’o direta pergunta ba membru Governu ne’ebé sira halo entrevista direta no indireta.
“Ohin iha ha’u-nia diskursu husu katak mídia ofisiál sira-nia papél importante iha ministériu hotu-hotu, tanba sira mak prepara dadus hodibele fornese ba autoridade ministériu nian, iha kestaun ne’e ba ministru, vise-ministru no sekretáriu estadu sira nune’e bele iha dadus forti, nune’e bele esklarese ba públiku kona-ba dezenvolvimentu serbisu ne’ebé hala’o iha idak-idak nian,” nia hateten ba jornalista sira iha salaun Dilopmátiku Ministériu Negósiu Estranjeiru no Kooperasaun, Praia dos Coqueiros, Dili, segunda ne’e.
Iha fatin hanesan, Xefe Departamentu ba Treinamentu no Jestaun Sistema Informasaun husi TIC Timor, Norberto Soares Cristovão, hateten TIC Timor introdús Sistema Diseminasaun Informasaun Integradu no sistema ida-ne’e nu’udár sistma dijitál online ne’ebé TIC servisu hamutuk ho SEKOMS kria hodi fasilita servisu mídia ofisiál sira, liuliu prezerva dokumentu sira dadus ofisiál ministériu, karik jornalista presiza bele oferese.
Jornalista: Natalino Costa
Editór: Xisto Freitas da Piedade
