DILI, 08 Abríl 2025 (TATOLI)–Deputada Bankada Governu husi Kongresu Nasionál Rekonstrusaun Timorense (CNRT), Maria Gorumali Barreto, klarifika informasaun kona-ba ko’a osan idozu $30 iha suku Kolimau, postu Bobonaru, munisípiu Bobonaru.
“Iha ha’u-nia intervensaun ne’e, horisehik Deputadu balun foti kona-ba kobransa ilegál ne’ebé mak dehan mosu iha suku Kolimau, entaun Xefe suku ne’e rasik rona no envia ninia informasaun mai ha’u, husu para ha’u hato’o iha plenária ne’e para públiku mós labele iha imajen a’at ba Xefe suku Kolimau, postu Bobonaru,” nia hato’o liuhusi reuniaun plenária Parlamentu Nasionál, tersa ne’e.
Deputada ne’e haktuir, iha suku Kolimau la halo kobransa ba inan-aman idózu sira, maibé iha de’it kontribuisaun husi sarani sira nu’udar Kolimau-oan sira, hahú husi xefe família, funsionáriu, emprezáriu, veteranu no traballadór iha diáspora no traballadór iha rai-laran.
“Kontribuisaun ne’e ba atividade vizita krús joven ne’ebé mak vizita iha suku Kolimau, hahú husi loron 10 to’o 28 Fevereiru 2025,” nia akresenta.
Notísia relevante : Benefisiáriu sira klarifika Xefe suku Kolimau la ko’a subsídiu idozu-Invalidés
Aleinde ne’e, kontribuisaun sira ne’e hotu liuhusi enkontru konsellu suku no komunidade sira hotu, hafoin foti desizaun, la’ós Xefe suku de’it mak foti desizaun.
“Osan kontribuisaun ne’e ba harii uma laku hodi tau krús joven nomós ai-han durante loron-18 vizita krús joven nian. Xefe suku mós hatete katak, komunidade hein hela no Deputadu relevante bele bá vizita direta iha suku Kolimau,” nia hato’o.
Antes ne’e, reuniaun plenária Parlamentu iha segunda (07/04), Deputadu Bankada Opozisaun husi Frente Revolusionária de Timor-Leste Indepedente (FRETILIN), José da Crus, hateten, komunidade suku Kolimau sira lamenta tebes ho Xefe suku Kolimau nian, ne’ebé mak foin daudaun idozu sira simu sira-nia osan, Xefe suku ne’e ko’a sira-nia osan $30, la hatene tanba sá no laiha justifikasaun.
Vise-Ministru Asuntu Parlamentár, Adérito Hugo da Costa, hateten kestaun ne’e presiza konfimasaun no nia-parte sei envia ba Ministériu Administrasaun Estatál (MAE).
Jornalista : Nelson de Sousa
Editora : Julia Chatarina
