DILI, 09 Abríl 2025 (TATOLI)—Komandante Polísia Nasionál Timor-Leste (PNTL) Munisípiu Dili, Superintendente Xefe Polísia Orlando Gomes, konsidera matebian Antigu Segundu Komandante PNTL, Komisáriu Mateus Fernandes bainhira halo servisu sempre tau aas disiplina iha kestaun servisu.
“Matebian ex-Segundu Komandante PNTL, Mateus Fernandes sempre disiplina iha servisu durante nia mandatu. Buat ne’ebé ha’u haree husi matebian, ema ida servisu ho nonook, ho ninia lideransa orienta ba membru sira halo servisu tuir regra no tuir lei ne’ebé mak iha. Ha’u pesoál ida-ne’e mak durante ne’e ha’u sente,” Orlando Gomes hateten ba jornalista sira iha matebian nia rezidénsia, Bebonuk, Dili, kuarta ne’e.
Orlando lori família boot Komandu PNTL Munisípiu Dili nia naran hato’o sentidu kondolénsia ba família matebian no husu atu matebian hetan fatin di’ak iha reinu-lalehan.
Notísia relevante: Antigu Segundu Komandante PNTL hakotu iis
Rekorda fali katak Antigu Segundu Komandante Polísia Nasionál Timor- Leste ne’e asumi kargu nu’udár Segundu Komandante PNTL hahú 2019-2023.
Hafoin mandatu ramata, matebian hala’o kna’ar hanesan asesór ne’ebé fó asesoria ba Ministériu Interiór ba área seguransa nian.
Matebian hakotu-iis iha tersa (8/4), tuku haat madrugada, tanba sofre moras komplikadu.
Jornalista: Natalino Costa
Editór: Xisto Freitas da Piedade
