DILI, 08 Abríl 2025 (TATOLI)–Vise-Ministru Fortalesimentu Institusionál, Paulo Remédios, tersa ne’e, presta omenajen ba falesimentu Antigu Segundu Komandante Polísia Nasionál Timor-Leste (PNTL), Komisáriu Mateus Fernandes.
Governante ne’e hateten ho falesimentu Antigu Segundu Komandante Jerál PNTL, Mateus Fernandes lori triste ba família, kolega no parente.
“Ohin ha’u mai iha-ne’e, atu hato’o ha’u-nia sentidu kondolénsia ba família señor Mateus nian. Ho matebian nia mate ida-ne’e lori mós tristeza ba ha’u no mós família,” Paulo Remédios hateten ba Tatoli hafoin presta nia omenajen ba matebian, iha Bebonuk.
Notísia relevante: Antigu Segundu Komandante PNTL hakotu iis
Governante ne’e koñese matebian Mateus Fernandes iha 2006, matebian nu’udár ema ne’ebé matenek, hahalok di’ak no ema iha prinsípiu no integridade.
“Ho nia falesimentu ha’u bele dehan ita lakon rekursu di’ak ne’ebé bele kontribui ba ita-nia prosesu dezenvolvimentu, liuliu dezenvolvimentu instituisaun polísia,” nia konklui.
Rekorda fali katak Antigu Segundu Komandante Polísia Nasionál Timor-Leste, Mateus Fernandes, asumi kargu nu’udár Segundu Komandante hahú iha 2019-2023.
Hafoin mandatu ramata, matebian Mateus Fernandes hala’o kna’ar hanesan asesór ne’ebé fó asesoria ba Ministériu Interiór ba área seguransa nian.
Matebian Mateus Fernandes, hakotu iis iha tersa (8/4), tuku haat madrugada, tanba sofre moras komplikadu.
Jornalista: Natalino Costa
Editór: Xisto Freitas da Piedade
