AINARU, 10 Abríl 2025 (TATOLI)—Xefe suku Leolima, Julio Nascimento husu ba Governu atu dezenvolve mina-matan ne’ebé lokaliza iha postu administrativu Hatu-Udu.
“Ami postu Hatu-Udu iha mina-matan bee-moos, oinsá Governu nia haree ba oin, bele dezenvolve ka la’e, atu substitui Bayu-undan ne’ebé ita rona atu maran ona ne’e,” Autoridade suku hateten durante intervensaun ba sosializasaun no konsultasaun públika kona-ba projetu autoestrada iha Hatu-Udu, kinta ne’e.
Nia dehan, bainhira Governu haree mina-matan ne’e hanesan prioridade, maka bele halo ona perfurasaun hodi avansa ba prosesu sira tuir mai no karik iha duni mina mak sei fó benefísiu ba povu Timor-Leste hotu.
“Se Governu haree mina bee-moos prioridade bele halo perfurasaun ona ba, ida-ne’e mós importante atu hatama retornu ba ita-nia nasaun,” Xefe suku katak.
Notísia relevante : Perfurasaun mina-matan tolu iha Suai tama ona faze deskobrimentu tékniku no komersiál
Hatan ba kestaun ne’e, Ministru Petróleu no Rekursu Minerál, Francisco Monteiro, hateten, mina ne’ebé lokaliza iha área bee-moos, Governu sei haree.
“La’ós iha bee-moos de’it, iha fatin barak mina sai husi rai iha Suai barak, iha Kosta Súl ne’e mós lubuk ida hanesan ne’e, no iha ne’ebá iha duni poténsia ba perfurasaun, ida-ne’e Timor GAP, E.P ho nia parseiru Timor Resource halo hela estudu,” Ministru Francisco dehan.
Governante ne’e hatutan, mina-matan bee-moos iha faze estudu no iha ona rezultadu pozitivu bele avansa ba perfurasaun hanesan iha fatin barak iha territóriu Timor-Leste.
“Se ida ita ko’alia ne’e mak estudu hatudu pozitivu mina, ita kontente tebes no sei lori benefísiu mai Timor-Leste. Maibé atu to’o ida ita kontente ne’e mós ita hisik kosar lubuk ida tanba empreza sira atu perfura ne’e hasai osan husi sira-nia bolsu ne’e millaun ba millaun, entaun sira atu tama halo kontratu ho Governu sira konsiente tanba iha kontratu ko’alia klaru, imi tenke esplora gasta osan hanesan ne’e hetan ita kontente, maibé posibilidade mós bele la hetan Estadu fó de’it obrigadu ba empreza ne’e,” Francisco tenik.
Jornalista : Hortencio Sanchez
Editora : Julia Chatarina
