DILI, 11 Abríl 2025 (TATOLI)—Estadu liuhusi instituisaun Komandu Polísia Nasionál Timor-Leste (PNTL) hamutuk ho família, sesta ne’e, hatoot ona kadáver (mate-isin) Antigu Segundu Komandante PNTL, Mateus Fernandes, iha Jardim dos Herois Metinaro.
Reprezentante Família Matebian, Francisco Borulaco, lori família nia naran hato’o agradesimentu ba entidade hotu-hotu liuliu ba família boot PNTL no Estadu ne’ebé durante ne’e fó apoiu ba prosesu funerál matebian Mateus Fernandes.
“Ha’u lori família boot Uatukarabau nia naran, agradese ba entidade hotu-hotu ne’ebé ohin partisipa iha fúnebre Komisáriu Mateus nian,” Francisco Borulaco dehan liuhusi nia intervensaun iha serimónia fúnebre mate-isin Antigu Segundu Komandante Jerál PNTL.
Iha fatin hanesan, Segundu Komandante Jerál PNTL, Komisáriu Polísia Pedro Belo, hateten Saudozu Komisáriu Jerál, Mateus Fernandes hanesan membru formandu ba dahuluk iha Polísia Nasionál Timor-Leste (PNTL) iha tinan 2000.
Dezde hala’o kna’ar, nia haktuir, matebian kaer ona kargu iha estrutura PNTL hanesan Komandante Operasaun, Komandante Administrasaun, Komandante Polísa Internasionál (INTERPOL-sigla inglés) to’o asumi kargu hanesan Segundu Komandante Jerál PNTL períodu 2019 to’o 2023.
“Durante saudozu nia mandatu husik hela obra lubuk ida ba dezenvolvimentu instituisaun PNTL to’o ohin loron. Soudozu hatudu ona nia kualifikasaun, kapasidade, profisionalizmu ne’ebé di’ak tebes no kontinua konstrui no konsolida forsa PNTL sai úniku no modernu,” nia informa.
Notísia relevante: Antigu Segundu Komandante PNTL hakotu iis
Pedro Belo hateten saudozu sempre prontu no apoiu serbisu PNTL ho ativu mezmu hasoru dezafiu sira durante nia mandatu.
“Nia (Komisáriu Mateus Fernandes) mós husik hela mensajen ba família soudozu nian katak PNTL sei nafatin hamutuk ho ita-boot sira, tamba ne’e husu ba família nafatin hakbesik-aan mai PNTL, odomatan PNTL sei nafatin nakloke ba ita-boot sira,” Belo tenik.
Komisáriu Belo hato’o agradesimentu mós ba Padre Angelo Salsinha ne’ebe prezide ona misa requiem ba matebian.
Pedro Belo mós lori instituisaun PNTL nia naran hato’o agradesimentu ba Prezidente Konsellu Kombatente Libertasaun Nasionál (CCLN-sigla portugés) по estrutura tomak nia apoiu no preparasaun ba fúnebre saudozu Komisáriu Mateus Fernandes.
Jornalista: Natalino Costa
Editór: Xisto Freitas da Piedade
