DILI, 15 Abríl (TATOLI)—Sekretáriu Estadu Komunikasaun Sosiál, Expedito Loro Dias Ximenes ho Diretór Ezektutivu Sentru Audiovizuál Max Stahl (CASMTL-sigla portugés), Eudicito Pinto, formaliza akordu kooperasaun nune’e ba futuru bele dijitaliza arkivu obra produtu jornalístiku Ajénsia Notisioza TATOLI, I.P no Rádiu Televizaun Timor-Leste, Empreza Públika (RTTL,EP).
Sekretáriu Estadu Loro Dias hateten akordu entre Sekretaria Estadu Komunikasaun Sosiál (SEKOMS) ho CASMTL ho objetivu oinsá bele transforma matéria vídeo RTTL nian ba dijitál, tanba durante tempu naruk liuliu RTTL nia kobertura iha 1999, 2000, 2001, produtu ho kasete sira-ne’ebé analog uza fita, entaun atu sustentabiliza produtu sira-ne’e, presiza transforma husi analog bá dijitál.
“Ba TATOLI, iha ona nia produtu ida-ne’ebé dijitál ona, maibé seidauk iha forma iha arkivu ne’ebé dijitál ka arkivu ne’ebé di’ak iha dijitalizasaun. Tanba ne’e mak iha nota entendimentu ida ohin ami asina ne’e atu fó kompeténsia ba iha CAMSTL oinsá mak atu hahú halo dijitalizasaun ba RTTL no TATOLI,” Expedito hateten ba jornalista sira hafoin asina nota entendimentu ho CMSTL, iha Palácio do Governo, tersa ne’e.
Nia dehan, RTTL no TATOLI sei selebara akordu servisu institusionál ho Sentru Audiovizuál Max Stahl molok ba nia implementasaun.
Expedito esplika akordu ida-ne’e Governu prevee $150.000 hodi finansia atividade dijtalizasaun arkivamentu obra produtu jornalístiku TATOLI no RTTL. Akordu ida-ne’e ba tinan ida.
Iha fatin hanesan, Diretór Ezekutivu CASMTL, Eudicito Pinto, apresia ba SEKOMS nia vontade hodibele fó konfiansa ba CAMSTL toma responsabilidade prezerva memória RTTL no TATOLI iha mundu dijitalizasaun.
“Hanesan ita hatene katak dijitalizasaun no prezervasaun ida-ne’e la’ós tinan ida ka rua nia servisu, maibé servisu ida-ne’e sei iha kontinuidade nune’e bele haloot ita-nia rikusoin ho sustentabilidade. Tanba ita iha istória mak ita iha nasaun no ita-nia pasadu mak prezente no prezente mak sei kria futuru,” nia afirma.
Nia esplika, mídia no jornalista sira-nia informasaun ka notísia, nu’udár patrimóniu no legadu importante ba nasaun ne’e.
Nia reprezenta CMSTL hato’o agradesimenu ba IX Governu Konstitusionál liuhusi Sekretaria Estadu Komunikasaun Sosiál fó konfiansa ba CAMSTL atu prezerva memória husi mídia boot rua ne’e, RTTL no TATOLI.
Jornalista: Natalino Costa
Editór: Xisto Freitas da Piedade
