DILI, 21 Abríl 2025 (TATOLI)-Komandante Polísia Nasionál Timor-Leste (PNTL) Munisípiu Dili, Superintendente Xefe Polísia Orlando Gomes, hateten Komandu PNTL Dili rejista númeru kazu krime iha Munisípiu Dili hahú tun.
Nia esplika, 2023 kazu krime iha munisípiu sa’e ba rihun rua resin númeru ne’e kompara kazu krime husi munisípiu Dili mak aas liu, maibé 2024 kazu krime iha Dili hahú tun ba rihun ida resin no tama ba 2025 iha fulan-tolu ba fulan-haat PNTL Dili rejista kazu krime 300, ida ne’e hatudu katak númeru kazu krime iha Dili hatudu redusaun.
“Hanesan ha’u informa ona katak ita halo diferensia ba kazu krime tinan 2023 kazu krime sa’e maka’as tanba iha rihun rua resin, ita haree fila fali ba 2024 ita hahú resin ba mil ital”, Komandante Orlando hateten ba jornalista sira iha nia kna’ar fatin Eskuadra Dom Aleixo Komoro, segunda ne’e.
Orlando esplika, 2025 Komandu PNTL munisípiu Dili nafatin reforsa viabilidade liuhusi patrollamentu la’o ain ho karreta no apoiu husi rekursu Konsellu Polísiamentu Komunitáriu hodi kontinua halo patrollu hodi halo prevensaun ba krime Dili.
Komandante Orlando hateten agora daudaun reativa fila-fali ona servisu Konsellu Polísiamentu Komunitáriu iha suku 31 iha Dili ho objetivu ajuda Ofisiál Polísia Suku hodi reforma servisu PNTL nia hodi intensiva kontrola bairru-bairru iha Dili laran, nune’e bele redús konflitu iha bairru bairru, espesiál iha Dili.
“Ha’u espera katak tinan 2025 ne’e sira servisu maka’as, nune’e ita hamutuk ho ita-nia komunidade atu identifika problema sira ne’ebé mosu iha bairru-laran, suku laran ida ne’ebé sira halo mediasaun ne’e halo mediasaun, ida ne’ebé mak iha krime nian mai iha komandu para ita halo prosesu. Maibé esforsu sira ne’e ita halo para atu redús krime iha kapitál Dili”, nia afirma.
Komandante PNTL munisípiu Dili ne’e hateten iha 2025 tuir planu no programa Komandu PNTL Dili nian aposta ba aposta ba kapasitasaun rekursu umanu ba membru sira oinsá halo atendimentu di’ak ho profisionál ba komunidade.
Jornalista : Natalino Costa
Editora : Rita Almeida
