DILI, 21 Abríl 2025 (TATOLI)-Polísia Nasionál Timor-Leste (PNTL) liuhusi Komandante Munisípiu Dili, Superintendente Xefe Polísia Orlando Gomes, relata situasaun seguransa durante selebrasaun paskua iha Dili laran hakmatek.
“Situasaun jeralmente iha kapitál Dili durante selebrasaun misa semana santa hahú husi kinta- feira to’o mai domingu resureisaun, la’o di’ak tebetebes, tanba koloka ita-nia seguransa sira hahú husi kapela too parókia inklui fatin sira ne’ebé ita konsidera nu’udar fatin risku”, haktuir nia ba jornalista sira iha ninia servisu fatin, eskuadra Don Aleixo Komoro, segunda ne’e.
Mesmu insidente balun mosu, nia dehan la perturba orden públiku no sarani sira selebra festa Jesus Nia Moris Hias ho livre no seguru.
Superintendente Xefe Polísia Orlando Gomes relata katak durante selebrasaun missa semana-santa, Komandu PNTL Munisípiu Dili halo apreensaun ba motorizada hamutuk 119, inklui halo apreensaun mós ba motorizada kanu resin 10.
Motorizada 119 ne’ebé Komandu PNTL Dili halo apreensaun, tanba la kumpre regra tránzitu, balun la uza kapasete, balun asesores motorizada laiha.
Motorizada sira ne’e, nia dehan agora daudaun asegura ona iha Komandu Munisípiu Dili, hodi kontinuasaun ba prosesu.
Alende ne’e, ninia parte mos rejista kazu asidente entre motor ho karreta no motor ho motor hamutuk sia. Akontese mos karreta ida soke halai ema la’o ain iha área Praia dos Coqueiros, kinta foin lalais ne’e.
“Agora daudaun suspeitu ita sei buka tuir, husu para nia koopera tanba sei ba check CCTV iha lokál krime tanba husu para motorista ne’ebé kondus karreta ne’e tenke entrega-an”, nia husu.
Kazu seluk ne’ebé rejista mak violénsia doméstika tolu, arma branka ida, asaltu ida, ofensa integridade fízika simples lima.
Kazu sira ne’e, nia hatete balun rezolve tuir família, no seluk fali aprezenta ba ministériu públiku.
Kazu sira ne’e akontese iha postu Administrativu Na’in-Feto, Kristu-Rei , Vera-Krus no kazu ida iha Don Aleixo.
“Kazu sira ne’e mesak simples, tanba ne’e mak durante semana santa ita la detein ema ida. Balun lanu ita lori mai halo identifikasaun no asegura, kuandu lanu ne’e moos ona, ita husik fali”, nia konklui.
Jornalista : Natalino Costa
Editora : Rita Almeida
