DILI, 22 Abríl 2025 (TATOLI)- Komandante Polísia Nasionál Timor-Leste (PNTL) Munisípiu Dili, Superintendente Xefe Polísia Orlando Gomes, relata Komandu Jerál Polísia Nasionál Timor-Leste alerta daruak ba membru polísia sira hotu husi Unidade Espesiál Polísia (UEP), Unidade Polísia Maritima (UPM) hodi asegura Munisípiu Dili hodi reforsa seguransa durante lutu nasionál ba falesimentu Sua Santidade Papa Francisco.
Governu hasai ona rezolusaun katak hahú tersa, 22 Abríl 2025 to’o tersa 28 Abríl 2025 nuudar loron lutu nasionál hodi fó omenajen ba falesimentu Sua Santidade Papa Francisco.
Notísia relevante: Governu dekreta Lutu Nasionál durante loron hitu ba falesimentu Papa Francisco
Komandante Jerál PNTL, Komisáriu Jerál Henrique da Costa, hasai ona orden alerta dois ba membru PNTL sira husi UEP no UPM apoia Komandu PNTL Dili reforsa seguransa iha kapitál Dili. nune’e fó biban ba entidade orgaun soberania sira, membru governu sira, korpu diplomátiku, entidade sira seluk no komunidade sira atu hasai orasaun no presta omenajen ba falesimentu Sua Santidade Papa Francisco.
“Ohin, Gorvernu deside ona lutu nasionál durante semana ida. Iha Lutu Nasionál ne’e Komandu Jerál Polísia Nasionál Timor-Leste fó ona orden ba Unidade Polísia sira atu garante seguransa. Tanba ne’e mak hahú kedan ohin dader, koloka ona ita-nia membru tránzitu sira atu blokeia ba dalan sira ne’ebé mak tama mai iha Lecidere”, Komandante ne’e afirma ba Jornalista sira iha Lecidere-Dili.
Durante Lutu Nasionál, Komandu Munisípiu Dili sei koloka membru ba fatin hanesan Tasi-Tolu hodi asegura altar santu, Episkopál Lecidere no Igreja Karedrál.
Lutu Nasionál durante semana ida ne’e PNTL iha obrigasaun tenke fó seguransa másimu tanba desizaun Governu nian.
“Ita tenke apoiu másimu ba seguransa atu nune’e atividade hotu ne’ebé mak hala’o iha fatin tolu ne’e bele la’o di’ak no susesu”,Orlando hateten.
Komandu PNTL Munisípiu hatutan:”Ita hatun hotu kedan efetivu sira hotu. Tanba bazea ba orden husi Komandu Jerál, ne’e orden alerta dois orden ida ne’e hotu hotu tenke tama servisu tantu husi Unidade Espesial Polisia, Unidade Polisia Maritima hotu hotu tama hodi fó seguransa ba lutu nasinál”,nia konklui.
Notísia relevante: Palásiu Prezidensiál hato’o omenajen ba Papa Francisco nia falesimentu
Jornalista: Natalino Costa
Editor: Florencio Miranda Ximenes
