DILI, 22 Abríl 2025 (TATOLI) – Ohin, Arsebispu Arkidioseze Metropolitana Dili, Don Virgílio Kardeál do Carmo da Silva dezloka ona ba Itália-Roma, hodi partisipa iha funerál Sua Santidade Papa Francisco no mós hola parte iha konklave eleisaun Papa foun nian.
Dezlokasaun Arsepismu nian ne’e responde mós ba karta husi dekanu kardeál sira iha Roma, atu halo enkontru. “Enkontru ida-ne’e tuir oras Itália nian, loloos ohin tuku sia maibé tanba ami ne’ebé dook seidauk bele tan ne’e mak ohin dadeer ha’u simu tan fali mensajen ida dehan urjente, tenke lalais”, Arsebizpu informa liuhusi konferénsia imprensa, iha sala VIP, Aeroportu Nicolau Lobato, Dili, ohin.
Tuir Arsebizpu Arkidioseze Metropolitana Dili, Don Virgílio Kardeál do Carmo, tanba viajen, sei la tuir enkontru iha Tersa no Kuarta ne’e no posibilidade tuir iha Kinta.
“Ha’u-nia viajen, primeiru, atu tuir serimónia funebre ne’ebé oras seidauk fó sai. Segundu, kardeais sira ne’ebé prepara atu tuir eleisaun ba Papa foun nian, atu hahú ona halo enkontru,” Kardeál afirma tan.
Entretantu, Arsebispu sei dezloka ho aviaun Citilink PK-GTK, meiu-dia ne’e.
Papa da-270
Sua Santidade Papa Francisco nu’udar Papa da-270, ne’ebé mak lídera ona igreja Katólika, to’o hakotu iis, iha loron 21 fulan-Abríl purvolta tuku 07:35 oras lokál (Roma nian), iha Casa Santa Marta.
Líder igreja Katólika mundiál ne’e, hahú iha tinan-2013 to’o 2025 to’o lakon vida, kauza husi derrame serebrál, koma no kardiorespiratória mak para.
Notísia relevante: https://tatoli.tl/2024/09/08/papa-sira-neebe-lidera-ona-igreja-katolika-iha-istoria-husi-sao-pedro-too-papa-francisco/
Jornalista: Egás Cristóvão Soares
Editór: Rafael Ximenes de A. Belo
