Ema liu rihun 50 presta ona omenajen ba maktoban Papa Francisco iha Vatikanu
DILI, 24 Abríl 2025 (TATOLI) – Depoizde mate-isin maktoban Papa Francisco tau iha Bazílika São Pedro, iha Vatikanu, ema liu rihun 50 mak liu ona Altár Konfisaun, dezde Bazílika loke ba sarani sira, iha kuarta-feira dadeer, hodi fó omenajen ba Santu Padre.
Bazílika São Pedro permanese aberta to’o tuku 5h30 dadeer kinta-feira oras Itália, depois sei taka durante oras ida ho balun antes loke fali iha tuku 7h00 dadeer.
Iha sesta-feira tuku 20h00 (iha 04h00 madrugada otl) sei halo ritu taka kaixaun Papa Francisco nian, ne’ebé sei prezide husi Kardeál Kevin Farrell, Camerlengo Santa Igreja Romana.
Serimónia taka kaixaun ne’e konta husi prezensa Kardeál no autoridade Santa Sé nian, nomós sei tranzmite husi kanál Vatican News.
“Momentu ne’e sei marka fin husi vizitasaun iha Bazílika São Pedro, ne’ebé simu ona ema rihun ne’ebé presta nia omenajen ba maktoban Papa”, haktuir husi Vatican News.
Misa funerál Santu Padre sei hala’o iha Prasa São Pedro iha tuku 10h00 (iha Dili tuku 5 loraik), iha 26 Abríl, ne’ebé prezide husi Kardeál Giovanni Battista Re.
Depoizde misa hotu, mate-isin Papa nian sei lori bá Bazílika Santa Maria Maggiore iha Roma, Itália, iha fatin ne’ebé sei haloot tuir nia legadu espirituál.
Papa Francisco hakotu iis iha loron 21 Abríl iha Roma, iha tuku 7:35 oras lokál, iha nia rezidénsia Casa Santa Marta ho idade 88.
Notísia relevante: Ritu taka kaixaun Papa Francisco halo iha sesta kalan
TATOLI
