DILI, 24 Abríl 2025 (TATOLI) – Arkidioseze Metropolitana Dili liuhusi Vigáriu Episkopál Pastorál arkiodioseze Dili, Pe. Jovito Rego de Jesus Araújo, ne’ebé daudaun ne’e dirije hela arkiodioseze Dili iha ausénsia kardeál, husu ba públiku atu labele toka múzika iha tempu lutu nasionál ba amu Papa Francisco nian.
“Presta omenajen ida-ne’e, ba públiku, sé membru Polísia Nasionál Timor-Leste (PNTL) sira ba karik husu imi atu labele toka múzika tanba ne’e ita halo lutu nasionál”, Vigáriu Episkopál Pastorál arkiodioseze Dili, Pe. Jovito Rego de Jesus Araújo, hateten ba jornalista sira iha Kámara Ekleziástika, Bidau-Lesidere, Dili.
Amu lulik ne’e apela, iha fatin sira hanesan luron, fa’an fatin sira hanesan merkadu, loja ka seluktan no iha ne’ebé de’it katak atu manifesta ita-nia atitude ida-ne’e ba mundu hodi hateten katak ita lutu tebes duni.
“Ita la’ós lutu ho ibun de’it, maibé ita lutu ho ita-nia fuan ho ita-nia hahalok, no mós atitude komportamentu sira”, padre ne’e reforsa.
Relijiozu ne’e hatutan tan, sarani sira hotu husi relijiaun Katólika, atu respeita momentu tristeza ida-ne’e, tanba lakon ona lideransa universál ida ba katólika, atu fó netik tempu balun hodi hanoin hikas amu Papa ninia di’ak tomak ne’ebé nia halo mai ita, nune’e mós refleta hikas mensajen sira-ne’ebé nia husik hela ba povu Timor, bainhira nia mai vizita ita-nia rai.
“Tanba ne’e iha loron hirak-ne’ebé Konsellu Ministru anúnsiu ona kona-ba lutu nasionál durante loron hitu ne’e, ita atu manifesta netik ita-nia atitude, komportamentu ne’ebé di’ak hodi hatudu katak ita hadomi tebes amu Papa Francisco”, nia haktuir
Entretantu lutu nasionál ne’e hala’o durante loron hitu, no sei ramata hafoin fúnebre ona amu Papa nia kadavér, nune’e sarani sira atu pasénsia hodi kumpre tuir orden ne’ebé iha tanba momentu importante hanesan ne’e la’ós bainbain ona maibé ida-ne’e omenajen espesiál.
Daudaun ne’e igreja mós koopera ho parte jestaun merkadu Munisípiu Dili hamutuk ho parte seguransa hanesan Polísia Nasionál Timor-Leste (PNTL) halo kontrola másimu iha Dili laran hodi fó avizu ba komunidade sira atu labele toka múzika iha tempu lutu nasionál. Bainhira iha ema ruma ne’ebé la kumpre maka sei prende ekipamentu hotu.
Notísia relevante:Governu dekreta Lutu Nasionál durante loron hitu ba falesimentu Papa Francisco
Jornalista: Alexandra da Costa
Edidór: Rafael Ximenes A. Belo
