ATAÚRU, 24 Abríl 2025 (TATOLI)—Sarani sira iha Parókia Ataúru hatudu sira-nia tristeza no respeitu kle’an ba Papa Francisco nia mate hodi hala’o misa espesiál kada loroklarik no kontinua ho orasaun/venerasaun to’o meia-noite.
Pároku Parokia Nossa Senhora de Fátima Ataúru, Padre Guido Pereira, esplika, atividade espirituál ne’e sei hala’o loron-loron to’o sábadu, loron Santu Padre nia funerál.
“Misa ne’e hahú iha tuku 17.00 iha Igreja Paroquial, ne’ebé partisipa husi sarani sira nakonu ho apresiasaun no matan-been emosionál tanba sente lakon Papa Francisco ne’ebé tinan kotuk vizita ona ita-nia nasaun, nia nakonu ho simplisidade,” Padre Guido hato’o ba Agência Tatoli, iha Sede Suku Beloi-Ataúru, kinta ne’e.
Notísia relevante : Vatikanu divulga projetu túmulu Papa Francisco
Nia dehan, hafoin misa, kontinua ho orasaun rozáriu, venerasaun, no knananuk to’o tuku 00.00 meia-noite. Ema barak lori lilin hodi mai sunu iha monumentu Nossa Señora nian iha Parókia oin.
“Ami mos halo atividade loke filme kona-ba Papa nia viajen, ita hatene nia hanesan ema ne’ebé nakonu ho domin no habelun ho ema hotu hodi loke diálogu entre relijiaun,” Amu hato’o.
Pároku Parókia Ataúru hateten, sarani Ataúru rasik durante ne’e hatudu ona kompromisu loloos atu tuir Papa Francisco nia bolun liuhusi dokumentu Laudato Si’, ne’ebé husu preokupasaun ba meiu-ambiente nu’udar parte fiar katólika nian.
Iha tinan hirak ikus ne’e, komunidade sarani iha Ataúru hala’o ho ativu prinsípiu ekolojia integrál, hahú husi hamenus lixu plástiku, kuda ai-horis, to’o prezerva tasi no bee-matan sira. Laudato Si’ nia hanorin mak matadalan prinsipál ba kongregasaun hodi mantein relasaun ne’ebé armonia entre ema ho kriasaun Maromak nian.
“Ho dokumentu Laudato Si’ ne’e mak ami la naran tesi ai, sunu rai arbiru, la oho animál, mensajen ne’e influensia tebes, atu ita ema hadomi malu no hadomi natureza,” nia esplika.
Padre Guido nafatin husu ba sarani sira iha Parókia Ataúru atu nafatin promove pás hodi hatudu ba mundu katak Timor-Leste hanesan Katólika maioria depoizde Vatikanu bele sai ezemplár.
Jornalista : Cidalia Fátima
Editora : Julia Chatarina
