DILI, 25 Abríl 2025 (TATOLI) – Vatikanu fó sai imajen túmulu Papa Francisco nian ne’ebé feita husi mármore husi rejiaun Ligúria, Itália nian.
Projetu túmulu ne’e lori de’it ho inskrisaun “FRANCISCUS” no reprodusaun krús peitorál Papa nian, informa sala imprensa Vatikanu.
Nota ne’e esplika katak fatin atu haloot Papa Francisco preparadu iha parte laterál Bazílika Santa Maria Maiór entre Kapela Paulina (Kapela Salus Populi Romani) no Kapela Sforza no lokaliza besik Altár São Francisco nian.
Iha domingu, loron 27 Abríl, túmulu Papa Francisco sei loke ba sarani sira atu vizita.
Papa Francisco sei haloot iha loron 26 Abríl. Daudaun nia mate-isin tau hela iha Bazílika São Pedro, nune’e ema bele bá presta omenajen.
Ema liu rihun 50 mak liu ona Altár Konfisaun, dezde Bazílika loke ba sarani sira, iha kuarta-feira dadeer, hodi fó omenajen ba Santu Padre.
Iha loron 25, iha tuku 8 kalan oras Itália, sei halo serimónia taka kaixaun, iha momentu ne’e sei marka fin husi vizitasaun iha Bazílika São Pedro, ne’ebé simu ona ema rihun ne’ebé fó omenajen ba maktoban Papa.
Notísia relevante: Ema liu rihun 50 presta ona omenajen ba maktoban Papa Francisco iha Vatikanu
TATOLI
