Antigu PAM Bobonaru tanis relembra memória hasoru Papa Francisco
BOBONARU, 26 Abríl 2025 (TATOLI)—Antigu Prezidente Autoridade Munisípiu (PAM) Bobonaru, Jeferino Soares, emosionalmente hamonu matan-ween (tanis) tanba hanoin hikas memória hasoru no kumprimenta direta Sua Santidade Papa Fransisco da-rua iha Roma no iha altar Santu Tasi-Tolu, Dili, hafoin reprezenta sarani Dioseze Maliana lee leitura iha selebrasaun misa solene iha Tasi-Tolu, 10 Setembru 2024 liubá ne’e.
Hanesan sarani ne’ebé durante ativu iha atividade igreja nia, Jeferino konsidera memória rua ne’e inesquecivél tanba nia hetan grasa no bensaun direta husi líder mundiál Igreja Katolika.
Notísia Relevante: Papa Fransisco husu Kardeál foun sai roman ba sarani tomak Maromak nian
“Ha’u konsege hasoru Amu Papa Fransisco da-rua. Primeiru, ha’u hasoru Papa Roma. Segundu, komu hanesan leitór iha misa hamutuk ho amu Papa, ha’u konsege hasoru mós amu Papa iha altar Santu Tasi-tolu no kumprimenta Amu Papa iha ne’ebá,” Nia informa ba jornalista Tatoli, iha Igreja Pro-katedrál Maliana, hafoin partisipa misa ba falesimentu Papa Fransisco, kinta (24 Abríl 2025) ne’e.
Ida-ne’e, nia dehan, sentidu triste tebe-tebes katak sarani sira lakon mahein di’ak ida, Jesus nia saseluk di’ak ida, la’o haleu mundu hodi haklaken domin Maromak nian bae ma hotu iha mundu.
Jeferino haklaken, memória ne’ebé susar sarani sira haluha mak momentu misa iha Tasi-Tulu, Santu Padre vizita sarani sira no Ema hotu-hotu sente haksolok inklui manu-fuik sira mós semo akompaña ema ho haksolok.
Ho espresaun triste, Jeferino hateten, nia ho familia sei halo tuir mensajen furak no osan-mean husi Papa Fransisco iha moris loro-loron.
“Ninia mensajen liuliu kona-bá domin, hadomi-malu no atensaun husi buat aat sira-ne’ebé bele mai estraga ita-nia komunidade, ita-nia fiar iha ita-nia rai-laran,” nia dehan.
Notísia relevante : Prezensa Papa Francisco hametin liután fiar nu’udar katóliku
Jornalista : Sergio da Cruz
Editór : Cancio Ximenes
