DILI, 26 Abríl 2025 (TATOLI)-Polísia Nasionál Timor-Leste koloka membru 1.500 hodi garante seguransa durante lutu nasionál ba falesimentu Papa Francisco no nia misa fúnebre iha Tasi Tolu, Dili.
Komandante Jerál PNTL, Komisáriu Jerál Henrique da Costa, hateten hahú husi tuku 08h00 iha Lesidere to’o Tasi Tolu ekipa seguransa polisiál husi munisípiu Dili, Unidade Espesiál Polísia (UEP), Unidade Polísia Marítima (UPM), Unidade Polísia Fronteira (UPF) no Polísia Tranzitu destaka ona seguransa iha route sira hodi akompaña sarani sira halo komboiu husi Lesidere to’o Tasi-tolu la’o ho di’ak.
Nia hateten, depoizde komboiu ramata seguransa sira retira no koloka fali membru iha Tasi Tolu iha tuku 14h00, nu’ne’e tuku 18h00 kontinua filafali halo seguransa ba misa loraik nian.
“Membru sira ne’ebé ita prepara halo seguransa ne’e , ida tun diretamente loron ohin ne’e hamutuk 1.000 no rezerva hamutuk 500 nune’e buat ruma sira bele responde”, Henrique da Costa dehan ba jornalista sira iha altár Santu Tasi Tolu, ohin.
Nia esplika katak parte loraik misa nian, PNTL sei la taka dalan iha Dili, maibé Tranzitu no UEP sira iha terrenu sei taka provizóriu de’it ba fatin sira ne’ebé sarani sira liu, despois loke fali.
Nia afirma katak seguransa ne’ebé koloka iha Tasi Tolu sei garante seguransa másima hodi evita ka prevene ema ruma uza oportunidade hodi halo fali asaun ruma.
“Parte seguransa sira hamutuk ho igreja nian hanesan THS no THM, inklui eskuteiru sira sei tau-matan ba ema ruma halo asaun ka intensaun ladi’ak ita foti kedas medida, evita halo destruisaun ba misa nian”, nia subliña.
Komandante ne’e esplika horisehik komisaun konjuta halo ona konferénsia imprensa katak iha misa orsida laiha atividade uza drone, karik iha tenke rejista iha PNTL, maibé to’o ohin loron PNTL rasik seidauk iha informasaun ruma kona-ba ema ruma atu hato’o katak sira uza rasik sira-nia drone.
“Ne’ebé orsida misa la’o mak akontese, ita sei foti medida ruma, tanba fatin ne’e besik aeroportu no protejidu, nune’e labele halo semo drone iha ne’e. Ami-nia IT mós sei halo nafatin koordenasaun ho parte Autoridade Nasionál Komunikasaun atu haree asuntu ida-ne’e”, nia hateten.
Notísia relevante: Sarani sira akompaña karreta Papa Francisco husi Lecidere bá Tasi Tolu
Jornalista : Arminda Fonseca
Editora : Maria Auxiliadora
