PR Horta to’o ona Roma no sei partisipa serimónia fúnebre Papa Francisco
DILI, 26 Abríl 2025 (TATOLI)—Prezidente Repúblika, José Ramos Horta ho delegasaun to’o ona iha Roma ne’ebé simu husi Ministru Negósiu Estranjeiru no Kooperasaun (MNEK), Bendito Freitas no akompañadu husi Embaixadora Timor-Leste bá Santa-sé, Cloe Tilman Dindo.
Notísia Relevante: Primeiru-Ministru relembra Papa Francisco ninia karta ensíklika sira
Prezensa Xefe Estadu nian iha Roma hodi reprezenta Estadu Timor-Leste atu partisipa serimónia fúnebre Papa Francisco nian.
“Prezidente Repúblika no reprezentante Governu Timor-Leste nian Ministru Negósiu Estranjeiru no Kooperasaun, Bendito Freitas sei partisipa iha serimónia fúnebre selene sumu pontífice Papa Francisco ne’ebé sei hala’o iha loron sábdu, 26 abril 2025 iha tuku 10 dadeer oras Roma,” tenik iha nota ne’ebé Tatoli asesu husi mídia MNEK, ohin.
Xefe Estadu ho delegasaun nia viajen bá Vatikanu, Roma, hafoin kompleta tiha vizita Estadu bá nasaun Bulgaria no vizita servisu nian bá Reinu Unidu.
Totál delegasaun Timor-Leste nian ne’ebé iha ona Vatikanu hodi partisipa iha serimónia sumu pontífice Papa Francisco nian kompostu husi Xefe Estadu, José Ramos Horta, reprezentante Governu Timor-Leste nian Ministru Bendito Freitas no mós Arsebispu Arkidioseze Metropolitana Dili, Dom Virgílio Cardeal do Carmo da Silva, SDB.
Jornalista : Hortencio Sanchez
Editór : Cancio Ximenes
