Top

PTR Konsidera Papa Francisco nu’udár líder simples no umilde

Sarani sira partisipa iha misa fúnebre Papa Francisco, iha Tasi Tolu, 26 Abríl 2025. Imajen Tatoli/António Daciparu

DILI, 26 Abríl 2025 (TATOLI)—Prezidente Tribunál Rekursu (PTR), Deolindo dos Santos, konsidera Sua Santidade Papa Francisco nu’udár líder simples no umilde.

“Sua Santidade Papa Francisco hanesan ema ida-ne’ebé simples tebes-tebes, umilde no Papa ba ema ki’ik sira,” Deolindo hateten ba jornalista sira hafoin partisipa misa fúnebre Sua Santidade Papa Francisco iha Tasi Tolu, sábadu ne’e.

Nia dehan, Papa Francisco la’ós Papa ba sarani Katólika de’it maibé ba Papa mós ba relijiaun seluk.

“Independentemente husi nia relijiaun maibé nia ema ida preokupa tebes-tebes jestaun mundu nian, tenta muda ema nia pensamentu atu moris ho pás liuhusi nia forma ne’ebé nia hala’o to’o nia hakotu nia jornada iha mundu,” nia haktuir.

 Notísia relevante: Kardeál Giovanni Batista Re prezide misa funerál Papa Francisco iha Roma

Deolindo hatutan Papa Francisco iha nia moris preokupa mós ba kestaun ambiente, tan ne’e nia husu mundu atu tau konsiderasaun no prioridade ba kestaun ambiente tanba nia haree katak ambiente ne’e hahú tun, nune’e bá-oin mundu bele tau-matan para ema moris iha mundu ne’e seguru no saudável.

Nia mós lembra husi vizita apostólika Sua Santidade Papa Francisco mai Timor-Leste, mós husu ba joven timoroan sira tenke kuidadu aan no banati oinsá atu iha espíritu serbí nune’e joven bele sai futura nasaun ne’ebé di’ak.

Jornalista: Natalino Costa

Editór: Xisto Freitas da Piedade

Publisidade

Leave a Reply

Latest Post

error: Content is protected !!