KSMJ la propoin kandidatu ba PR Horta kona-ba nomeasaun Prezidente Tribunál Rekursu

DILI, 28 Abríl 2025 (TATOLI)—Prezidente Tribunál Rekursu, Deolindo dos Santos, hateten Konsellu Superiór Majistratura Judisiál (KSMJ) la propoin naran kandidatu Prezidente Tribunál Rekursu foun ba Prezidente Repúblika (PR), José Ramos Horta, atu halo nomeasaun iha Abríl tinan ne’e tanba nomeasaun ba kargu referidu nu’udár kompeténsia Xefe Estadu.
“Ha’u atu dehan ba públiku Timor tomak katak atu hili Prezidente Tribunál Rekursu ne’ebé agora ezerse funsaun Prezidente Supremu Tribunál Justisa nian, Prezidente Tribunál Administrativu Fiskál no Konta nian, ne’e kompeténsia maihusi Prezidente Repúblika ninian rasik. La presiza iha proposta ruma husi Konsellu Superiór Majistratura Judisiál ka husi Governu, ka husi Parlamentu,” Deolindo hateten ba jornalista sira hafoin partisipa aniversáriu Programa Monitorizaun Sistema Judisiáriu (JSMP-sigla inglés) ba dala 24 ne’ebé hala’o iha Salaun Delta Nova, Dili, segunda ne’e.
Nia dehan, agora Prezidente Repúblika hakarak atu rona Konsellu Superiór Majistratura Judisiál Governu ka Parlamentu, ka sosiedade sivíl, ne’e pur vontade, más la’ós obrigatóriu.
Notísia relevante: PN aprova alterasaun Lei Organizasaun Judisiária iha finál globál
Deolindo hateten, maski agora dadaun Parlamentu Nasionál halo hela alterasaun ba Lei Organizasaun Judisiária, maibé ida-ne’e la fó impaktu ba nomeasaun ba kargu Prezidente Tribunál Rekursu foun tanba ne’e orgaun idak-idak nia kompeténsia atu halo.
“Agora kona-ba lei ne’ebé sira halo alterasaun, espera bele responde nesesidade povu ka serbí di’ak liután povu,” nia subliña.
Iha oportunidade ne’e, Deolindo mós lakohi fó komentáriu kona-ba altersaun Lei Organizasaun Judisiária ne’ebé fó biban ba juíz segunda klase asumi kargu Prezidente Tribunál Rekursu.
“Nu’udár Prezidente Tribunál Rekursu ha’u mós hanesan juíz. Ha’u hakarak ka lakohi kumpri Konstituisaun no Estatutu Majistratura Judisiál ne’ebé mak iha no lei sira seluk, tanba ne’e labele ko’alia arbiru,” nia konklui.
Jornalista: Natalino Costa
Editór: Xisto Freitas da Piedade

