DILI, 29 Abríl 2025 (TATOLI)—Ministru Negósiu Estranjeiru no Kooperasaun (MNEK) Timor-Leste, Bendito Freitas, hala’o enkontru koordenasaun téknika ho Sekretáriu Ezekutivu Komunidade País sira-ne’ebé Ko’alia Lian Portugés (CPLP, sígla portugés), Zacarias Albano da Costa, iha otel Eurostar Lisboa, Portugál.
Notísia Relevante: Zacarias Albano atualiza serbisu Sekretáriu Ezekutivu CPLP ba PPN
Durante enkontru, Ministru Negósiu Estranjeiru no Kooperasaun ho Sekretáriu Ezekutivu avalia kona-ba progresu servisu CPLP nian, no mós solusiona dezafiu sira-ne’ebé iha hodi bele garante nafatin unidade entre estadu-membru sira.
“Enkontru koordenasaun téknika entre MNEK Timor-Leste ho Sekretáriu Esekutivu CPLP, atu rona kona-ba progresu no avansu servisu iha CPLP nia laran, dezafiu ne’ebé iha atu buka solusaun apropriada ba situasaun, atu bele garante nafatin unidade entre estadu-membru,” Ministru Bendito hateten liuhusi nota ne’ebé Agência TATOLI asesu husi mídia MNEK, ohin.
Liuhusi reuniaun ne’e mós atu bele konsolida liután unidade entre reprezentante Komisaun Konsertasaun Permanente, Embaixadór sira ho Sekretáriu Ezekutivu, nune’e prosesu implementasaun programa no atividade hotu CPLP nian bele la’o ho di’ak hodi lori rezultadu satisfatória ba komunidade CPLP.
“Dezafiu hotu-hotu sai hanesan momentu atu bele fortifika liután komunidade (CPLP), no husu atu hotu-hotu kontribui pozitivamente ho konfiansa profisionál no diplomátika atu bele serbí di’ak liután komunidade ida-ne’e,” Bendito dehan.
Jornalista : Hortencio Sanchez
Editór : Cancio Ximenes
