BOBONARU, 29 Abríl 2025 (TATOLI)—Uniaun Juventude Maubere (UNIJMA) ativista Pro-RDTL mini-brigada konsentrada setór III, tersa ne’e, ko’a (kolleta) hare rai-maran hamutuk ektare haat (4) iha área Boukhou, aldeia Pipgalak II, suku Tapo-Memo, postu administrativu Maliana, munisípiu Bobonaru.
Notísia Relevante: UNIJMA lansa fatin hakiak manu timor no kuda ai-oan iha Lour
Prezidente Organizasaun Populár Traballadór Timor (OPTT), Ivo de Jesús, hateten atividade kuda hare rai-maran iha natár parte foho-lolon ne’e, nu’udár inisiativa membru CPD-RDTL nian atu parte hotu no timoroan sira-ne’ebé hasa’e kursu modernu iha rai-li’ur atu banati-tuir.
“Natar ho hare rai-maran ida-ne’e eziste iha rai-lolon foho-leten, natar ida-ne’e la fornese bee husi mota maibé husi udan-been. Tanba ne’e, alerta ba Bobonaru, Maliana ne’ebé iha rai-tetuk, rai-lolon, labele halo to’os de’it maibé rai sira-ne’e ami konsege koko tiha ona rezultadu liuliu Pipgalak, Mehen no ohin iha Boukhou mosu rezultadu boot tebes,” Nia informa ba Jornalista sira hafoin kolleta hare ne’e.
Atu konsolida ekonomia Nasionál, líder UNIJMA ne’e rekomenda ba Estadu, Governu, Igreja no parte hotu atu mobiliza komunidade halo natar, halo to’os inklui haki’ak-animál, nune’e bele kore dependénsia ekonomía husi rai-li’ur.
“Atu labele hakilar ba ema nia hahan, ita garantía ba hahan husi rai-li’ur, problema ruma kuandu akontese, ema la fó hahan mai Estádu bele risku, realiza hatudu ema hasa’e taxa liuliu valór ekonómíku. Ita mak hakilar, ita mak hamlaha, ne’e sentidu katak ema la presiza tau-fali ba ita-nia kakorok maibé ita na’in rasik mak tau-tali ba ita-nia kakorok dada tama ba hamonu iha tasi,” Nia dehan.
Notísia Relevante: Kooperativa CDP-RDTL kolleta hare ektare rua iha Matahoi
Jornalista : Sergio da Cruz
Editór : Cancio Ximenes
