OEKUSI, 30 Abríl 2025 (TATOLI) – Primeiru-Ministru, Kay Rala Xanana Gusmão, hala’o diálogu ho komunidade iha suku Usitasa’e, Bobometo no Usitaqueno, iha sub-rejiaun Oésilo, Rejiaun Administrativa Espesiál Oekusi Ambeno (RAEOA).
Iha ámbitu diálogu ohin ne’e, xefe Governu hato’o katak nia sente kontente ho populasaun sira, tanba maioria partisipa hodi rona programa Governu nian.
“Ha’u kontente tebes, tanba ohin ha’u mai fali Oésilo atu ko’alia ho imi, bele haree ha’u-nia bin no maun sira, balun fuuk-mutin ona. Kontente tebes bá iha Oekusi, prova loloos katak Atoni-oan sira forte no isin di’ak, maski hasoru problema oioin”, primeiru-ministru dehan.
Iha biban ne’e, xefe Ezekutivu enkoraja foinsa’e sira atu respeita ferik no katuas sira, nu’udar inisiadór ba luta ukun rasik-aan no nu’udar mós memoria nasaun ne’e nian.
Primeiru-ministru mós introdús kona-ba objetivu vizita Oekusi mak atu ko’alia ho komunidade hodi rona direta preokupasaun no rekomendasaun sira, ne’ebé durante ne’e sira enfrenta iha baze.
“Ha’u mai atu hasoru imi, atu ko’alia lala’ok Estadu Timor-Leste. Imi-nia susar, terus no sakrifísiu mak ohin ita hamriik hanesan Estadu ida. Tan ne’e, ha’u mai atu husu imi-nia hanoin, tanba Estadu ne’e atu hamriik, imi tenke hato’o mós hanoin balun ba Estadu no Governu. Tan ne’e, Estadu iha obrigasaun, iha polítika atu hadi’a povu nia moris”, nia realsa.
Jestór Sub-rejiaun Oésilo, Benedito Ulan, agradese ba prezensa primeiru-ministru, tanba bele ko’alia direta ho komunidade sira husi suku tolu, atu rona povu nia hanoin ba dezenvolvimentu Oekusi nian.
“Ohin, komunidade suku tolu preparadu atu mai hasoru avó Nana atu rona direta ita-boot no sei hato’o mós rekomendasaun no hanoin balun ba lala’ok administrasaun iha RAEOA ne’e. Ita observa rasik sira partisipa másima atu rona saida mak maun boot ko’alia ba komunidade”, nia hato’o.
Notísia relevante: Abitante Huabanais-Oésilo levanta kestaun balun ba Primeiru-Ministru atu konsidera
Tuir observasaun jornalista Tatoli, prezensa primeiru-ministru iha sub-rejiaun Oésilo akompaña mós husi Sekretáriu Estadu Komunikasaun Sosiál, Expedito Dias Ximenes, Prezidente Autoridade RAEOA, Rogério Lobato, no sekretáriu rejionál sira, inklui ekipa husi ZEEDOA.
Jornalista: Abílio Elo Nini
Editora: Maria Auxiliadora
