DILI, 29 Abríl 2025 TATOLI)—Prokuradór Jerál Repúblika (PJR), Alfonso Lopez, hateten tuir Estatutu Konsellu Superiór Majistratura Ministériu Públiku, maski atuál PJR nia mandatu terminadu ona iha 29 Abríl, maibé kuandu seidauk iha Prokuradór Jerál Repúblika foun, prokuradór atuál kontinua asumi kargu referidu to’o hetan nomeasaun foun.
Nia esplika, Estatutu Konsellu Superiór Majistratura Ministériu Públiku númeru 7/2022, 19 Maiu, alterasaun daruak iha artigu 26 númeru 5 hateten PJR nia mandatu ramata kuandu Prezidente Repúblika nomea ona no fó pose ba Prokuradór Jerál Repúblika foun.
“Kuandu Prezidente Repúblika nomea no fó pose ona Prokuradór Jerál Repúblika foun, apartir nia simu pose ne’e mak Prokuradór Jerál Repúblika atuál nia mandatu foin hotu,” Alfonso hateten ba TATOLI hafoin partisipa serimónia pose ba Prezidente Tribunál Rekursu foun, Afonso Carmona, iha Palásiu Prezidensiál Bairro Pite, tersa ne’e.
Nia esklarese, Prokuradór Jerál Repúblika, nomeadu husi Prezidente Repúblika, ouvidu Governu, haktuir artigu 194, nº.1, no mandatu husi Prokuradór Jerál Repúblika iha durasaun tinan haat, renovável dala ida de’it, haktuir artigu 26, nº.1, no Prokuradór Jerál Repúblika sesa ninia funsaun sira ho pose husi nomeadu Prokuradór Jerál Repúblika foun, haktuir artigu 26, nº.5, hotu-hotu husi Lei nº.7/2023, 5 Abríl, alterasaun dahuluk ba Lei nº. 7/2022, 19 Maiu, Estatutu Ministériu Públiku.
Enkuantu, Alfonso informa, ba kargu Adjuntu Prokuradór Jerál Repúblika tuir Estatutu Majistratura Ministériu Públiku, atu hili Adjuntu Prokuradór Jerál Repúblika ne’e Prezidente Repúblika tenke rona Konsellu Superiór Majistratura Ministériu Públiku nia hanoin molok halo nomeasaun.
Jornalista: Natalino Costa
Editór: Xisto Freitas da Piedade
