DILI, 05 Maiu 2025 (TATOLI) – Governu Timor-Leste parabeniza Lawrence Wong ne’ebé hametin nia mandatu nu’udar Primeiru-Ministru Singapura, hafoin simu kargu ne’e iha Maiu 2024.
Iha tinan kotuk, Lawrence Wong asume pozisaun ne’e hafoin Lee Hsien Loong, ne’ebé xefia ona Governu Singapura durante dékada rua termina nia mandatu.
Lawrence Wong ne’ebé lidera Partidu Asaun Populár (PAP) hetan vitória iha eleisaun jerál ne’ebé hala’o iha loron 03 fulan-Maiu tinan 2025.
Xefe Ezekutivu timorense, Xanana Gusmão, hateten rezultadu eleisaun ne’e hanesan demonstrasaun forte ida ba konfiansa ne’ebé povu Singapura iha ba Lawrence Wong, ba nia lideransa, jestaun no vizaun ba futuru Singapura nian.
“Papél estabilizadór fundamentál iha Sudeste Aziátiku no liután, ne’ebé dezempeña husi Singapura. Lideransa ita-boot nia país iha promosaun komérsiu nakloke, investimentu no kooperasaun, nomós defeza ba diálogu no dame, kontribui maka’as ba dezenvolvimentu no prosperidade ita-nia rejiaun nian”, Xanana hato’o liuhusi nota Governu ne’ebé TATOLI asesu, ohin.
Xanana Gusmão apresia ba relasaun amizade no kooperasaun ne’ebé metin entre Timor-Leste no Singapura, no hato’o esperansa atu “iha kolaborasaun metin [ho Governu Lawrence Wong] nune’e hametin liután ita-nia lasu bilaterál no esplora área foun sira ne’ebé fó benefísiu mútuu”.
Xefe Ezekutivu Timor-Leste reafirma kompromisu pais nian ba integrasaun rejionál no agradese ba “apoiu prátiku husi Singapura, liuliu ninia asisténsia hodi hametin ami-nia funsaun públika atu prepara adezaun ba ASEAN”, ne’ebé “reflete espíritu solidariedade no parseria ne’ebé apoia ita-nia rejiaun”.
Primeiru-ministru dezeja atu aprofunda relasaun entre país rua no hodi kontribui ba pás, estabilidade no seguransa iha rejiaun.
Iha sorin seluk, Ministru Prezidénsia Konsellu Ministrus no Portavós Governu, Agio Pereira, subliña katak “Singapura sai nu’udar parseiru ida ne’ebé konsistente no estratéjiku ba Timor-Leste, la’ós de’it iha prosesu adezaun ba ASEAN, maibé mós iha fahe koñesimentu no kapasidade institusionál”.
Tuir nia, Primeiru-Ministru Lawrence Wong nia lideransa reprezenta kontinuidade konfiansa no oportunidade foun ida atu hakle’an kooperasaun bilaterál.
Tuir Antara News, Partidu Asaun Populár manán maioria iha eleisaun jerál Singapura. Vitória husi partidu ne’ebé ukun kle’ur ona iha Singapura ne’e fó Primeiru-Ministru Lawrence Wong mandatu ne’ebé klaru atu navega nia país.
PAP konkista hotu, esetu kadeira 10 husi 97 asentu lejizlatura unikamerál husi totál 65,57% husi votante liu millaun 2,4.
Lawrence Wong hato’o katak mandatu ne’e sei pozisiona Singapura iha fatin ne’ebé di’ak liu atu hasoru situasaun globál. Aleinde ne’e, hanesan sinál konfiansa, estabilidade, no konviksaun klara ba governasaun.
TATOLI
