DILI, 06 Maiu 2025 (TATOLI) – Membru órgaun lejislativa husi bankada opozisaun vizita komunidade afetada inundusaun iha aldeia Moris foun, suku Komoro, ne’ebé agora hela iha Karantina Tasi-tolu, ho objetivu prinsipál atu haree situasaun reál komunidade afetada ba inundasaun tanba sira rona katak Governu liuhusi SEATOU atu hasai komunidade sira ho obrigatoriamente.
“Entaun se hanesan ne’e ami ba buka sira para hatene sira-nia preokupasaun. Sira mai iha ne’e la’ós ho sira-nia hakarak maibé sira vítima ho atuasaun despeza administrasaun liubá”, Deputadu bankada FRETILIN, Antonino Bianco informa ba jornalista sira iha Karantina Tasi-Tolu, Dili, ohin.
Nune’e, tuir membru parlamentu ne’e, nia mós tuun direta hodi buka hatene kona-ba situasaun komunidade nian; balun forsadamente sira lori ba foho, no lahatene sira-nia problema rezolve ona ka seidauk maibé agora balun fali sira lori mai iha Karantina hela durante fulan rua, balun fulan tolu ona.
“Sira-nia direitu to’o agora seidauk hetan tanba ne’e mak se komunidade sira-ne’e seidauk hetan sira-nia direitu, no hasai husi ne’e sein iha preparasaun ne’ebé mak di’ak nune’e ami hanesan povu nia reprezentante tenke mai rona no haree,” nia hateten.
Tanba, membru órgaun lejislativu hein katak Governu rona no responde komunidade sira-nia ejizénsia. Governu tenke haree kondisaun katak se rai mak Estadu nian entaun komunidade sira mós ema Estadu. Nune’e, buka rai para sira ho osan ne’ebé iha karik sira bele konstrui uma.
“Estadu iha tanba ema. Nune’e, rona sira, ami mós sei hatutan fali, para antes sira atu sai, iha mós kondisaun di’ak ba sira”, nia aumenta.
Liga ba prorietáriu uma, Deputadu bankada FRETILIN, Antonino Bianco hateten katak uma sira ne’ebé sobu tiha ona ne’e tenke kalkula ninia kustu tanba sira iha oan – balun ne’ebé daudaun ne’e hala’o hela eskola, nune’e Governu ninia dever tenke responsabiliza ba nia povu tomak atu fó moris di’ak.
“Tanba ne’e hanesan povu nia reprezentante ami iha dever atu hakbesik sira, rona sira-nia aspirasaun no hatutan sira-nia aspirasaun para governante sira bele rezolve”, nia aprofunda.
“Ita halo ema vítima dala rua, dala tolu, ne’e la’ós ukun hanesan ne’e?! Ukun para halo ema labele vítima beibeik, no hasai ema obrigatoriamente ba fatin seluk. Ne’e ami la konkorda ida. Ne’e violasaun direitus umanus ba labarik sira hosi eskola. Ami lakohi povu nia inan-aman vítima, liuliu nia oan sira”, nia afirma.
Notísia relevante:Deputadu FRETILIN preokupa ho atendimentu SEATOU ba komunidade iha Karantina
Jornalista: Alexandra da Costa
Editór: Rafael Ximenes de A. Belo
