DILI, 03 Maiu 2025 (TATOLI)—Antigu Prezidente Repúblika no Primeiru-Ministru, Taur Matan Ruak, apela ba jornalista sira hato’o nafatin lia-loos no lian husi povu kbiit laek sira-nian, maske jornalista sira agora iha presaun nia laran husi ukun-na’in sira.
Notísia Relevante: PR Horta: Seidauk iha problema ho Liberdade Imprensa iha TL
“Nune’e, ha’u enkoraja nafatin ita-boot sira foti nafatin problema sosiál, ekónomia ne’ebé ita-nia povu hasoru iha ukun ida-ne’e hanesan problema eviksaun forsada sein kria uluk kondisaun, probelma nesesidade bázika, problema saúde, problema edukasaun no seluk tan. Iha situasaun sira hanesan ne’e, ita-boot sira-nia papel importante tebes fó kontribuisaun oinsá tulun ita-nia populasaun sira iha divulgasaun informasaun ne’ebé loos, justu, kredivel no mais edukativu atu ita-nia ukun-na’in sira rona no tau matan ba sira,” Taur Matan Ruak hateten liuhusi nota ne’ebé Agência Tatoli, ohin.
Líder nasionál ne’e hato’o agradesimentu no hato’o votu felisitasaun ba jornalista sira hotu iha mundu tomak no partikularmente iha Timor-Leste ne’ebé ohin (03 Maiu) selebra loron mundiál liberdade imprensa.
“Hakarak hatao’o votu felisitasaun ba jornalista sira iha mundu tomak no espesialmente ba ba ha’u-nia oan jornalista timoroan sira hotu, ba imi-nia loron espesiál ohin,” Taur Matan Ruak hateten liuhusi nota ne’ebé Agência Tatoli, ohin.
Loron 03 fulan-maiu, nu’udar loron espesial ida ba jornalista sira, loron ne’ebé nasaun unida adota hanesan Loron Mundiál Liberdade Imprensa nian hodi fó hanoin ba país hotu iha mundu tomak atu respeita no valoriza Liberdade Imprensa nian.
Index Liberdade Imprensa munsiál nian ba tinan 2025 husi RSF, hatuur Timor-Leste nia índex liberdade imprensa iha númeru 39 ho pontu 71,79 husi totál país 180, katak Timor-Leste nia index Liberdade Imprensa monu iha ukun IX Governu nian, ne’e hatudu katak TL nia Liberdade Imprensa iha prekupante nia laran.
“Iha VIII Governu Konstitusionál ne’ebe ha’u lidera, ita fó liberdade ba imprensa sira hala’o sira-nia kna’ar ho livremente sem interevensaun ruma iha sira-nia redasaun, ita husu mak sira nia responsabilidade oinsá hato’o notísia ho loloos, imparsial, Independente, tuir faktus no kode étika Jornalista sira- nian, tanba Jornalista nu’udar pilar importante ida ba ita-nia demokrásia,” Taur hateten.
TATOLI
