DILI, 03 Maiu 2025 (TATOLI)—Prezidente Repúblika (PR), José Ramos Horta, hateten maske Timor Leste nia index liberdade imprensa mundiál tinan 2025 ne’e tun husi 20 ba 39, maibé to’o oras ne’e seidauk iha problema ho liberdade imprensa iha Timor Leste.
Notísia Relevante: TL okupa index liberdade imprensa 39, SEKOMS sei halo sensibilizasaun
“Timor-Leste kontinua ho liberdade imprensa totál, laiha problema ho liberdade imprensa iha Timor-Leste, laiha interferénsia husi Governu. Tinan 20-resin ona, ha’u nunka rona jornalista no mídia balun taka tanba interferénsia Governu nian ka hatama jornalista sira iha komarka. Ha’u nunka rona ida-ne’e,” Prezidente Repúblika, José Ramos Horta, hateten ba jornalista iha Plaza, sábadu ne’e.
Tuir PR Horta, durante tinan 20 resin ona, jornalista no mídia Timor-Leste la hetan problema ka interferensia ruma husi Governu.
“Ha’u lahatene tanbasá, maibé imi nu’udar jornalista sira iha rai-laran hatene di’ak-liu, tanba ida-ne’e imi-nia liberdade. Maibé husi ha’u-nia observasaun, ha’u haree katak laiha problema kona-ba liberdade imprensa. Karik iha ema ruma mak fornese informasaun imparsiál ba organizasaun iha rai-li’ur, maibé ha’u la observa ida-ne’e tanba ne’e ha’u lahatene,” nia hateten.
Xefe Estadu subliña, Timor Leste nu’udár nasaun demokrátiku no la limita liberdade imprensa iha Timor Leste.
Tanba ne’e, Xefe Estadu ne’e mós mós husu ba jornalista sira atu protesta hasoru index liberdade imprensa Timor-Leste ne’ebé monu iha tinan ida-ne’e, tanba liberdade imprensa iha TL la limitadu.
“Iha posibilidade katak ema ruma iha organizasaun halo polítika kona-ba rezultadu sira tanba sira mai husi partidu oioin,” nia hatete.
Tuir PR Horta, jornalista TL iha liberdade imprensa barak liu kompara ho nasaun sira seluk hanesan Gaza, Israel, Myanmar no seluk tan, ne’ebé jornalista barak mak mate bainhira halo kobertura ba notísia.
Notísia Relevante: Selebra loron mundiál liberdade imprensa: Impaktu Intelijénsia Artifisiál ba liberdade imprensa
Jornalista : Osória Marques
Editór : Cancio Ximenes
