DILI, 06 Maiu 2025 (TATOLI)—Prezidente Tribunál Rekursu (PTR), Afonso Carmona, kontinua hala’o funsaun hanesan juíz iha Tribunál Judisiál Primeira Instánsia Dili hodi hola-parte nu’udár Juíz Koletivu ba kazu José Bernardo ne’ebé mate iha sela Komandu Polísia Nasionál Timor-Leste (PNTL) Munisípiu Dili, Kaikoli, Setembru 2022.
Kazu José Bernardo ne’e, prezide husi juíz koletivu kompostu husi José Eskuriál, Juiza Francisco Cabral no Juíz Afonso Carmona.
Nune’e, iha tersa (06/5), Tribunál Judisiál Primeira Instánsia Dili kontinua hala’o julgamentu ba kazu José Bernardo nian ne’ebé mate iha sela Komandu PNTL Dili.
Iha ajenda julgamentu ba kazu referidu, Tribunál kontinua rona depoimentu husi sasin sira liga ho kazu ne’e.
Entretantu, Prezidente Tribunál Rekursu, Afonso Carmona, to’o iha edifísiu Tribunál Judisiál Primeira Dili iha tuku 14:00 Otl, ho karreta Prezidente Tribunál Rekursu nian ne’ebé ho xapa matríkula PTR no akompaña husi eskoltu.
Bainhira karreta para tiha iha edifísiu Tribunál Judisiál Primeira Instánsia nia oin, Juíz Afonso Carmona tun hodi la’o tama ba edifísiu Tribunál hodi hasee liu tiha funsionáriu ofisiál justisa.
Molok tama ba sala julgamentu hodi hola-parte iha juíz koletivu ba kazu José Bernardo nian, Prezidente Tribunál Rekursu Afonso Carmona mós hasee jornalista destakadu iha Tribunál hodi dehan imi di’ak ka lae?
“Agora ha’u seidauk bele ko’alia buat ida ba imi,” Afonso Carmona ba jornalista iha Tribunál Judisiál Primeira Instánsia Dili, Kaikoli, tersa ne’e.
Hafoin hasee tiha jornalista sira, Prezidente Tribunál Rekursu hakat tama bá sala julgamentu hodi hola-parte iha juíz koletivu hodi halo julgamentu ba kazu José Bernardo.
Iha sorin seluk, Jurista Sergio Dias Quintas dehan, se kazu ruma mak antes ne’e Prezidente Trubunál Rekursu, Afonso Carmona, integra iha prosesu ruma ne’ebé la’o hela iha iha Tribunál Judisiál Primeira Instánsia, ba prosesu sira-ne’e nu’udár prosesu kontinuasaun de’it.
“Nia (Juíz Afonso Carmona) labele atribui fali kazu ne’e bá juíz sira seluk atu kontinua. Kazu ne’ebé kategoria re-julgamentu ba prosesu, Prezidente Tribunál Rekursu kontinua envolve. Só ba prosesu foun mak nia labele hola-parte ona,” Sergio Quintas hateten ba Tatoli via telefónema.
Quintas esplika, kuandu kazu ne’e to’o ona finál hodi foti desizaun, Prezidente Tribunál Rekursu Afonso Carmona bele foti desizaun tanba nia hanesan juíz koletivu ne’ebé hola-parte iha prosesu ne’e, maibé kuandu prosesu ne’e mak ema halo rekursu hodi kontesta desizaun Tribunal Judisiál Primeira Instánsia nian bá iha Tribunál Rekursu, hanesan Prezidente Tribunál Rekursu, Afonso Carmona tenke impedidu iha prosesu ne’e hodi labele foti desizaun iha rekursu ne’e tanba nia (Afonso Carmona) halo ona funsaun hanesan Prezidente Tribunál Rekursu.
Rekorda fali katak bazeia ba lei númeru 5/2022, 30 Marsu, kona ba Estatutu Majistradu Judisiáriu, hateten juíz sira-ne’ebé mak molok ne’e hola-parte ona koletivu iha prosesu sira maibé kuandu ezerse fali funsaun iha fatin seluk, nia iha nafatin responsabilidade atu kontinua hola-parte iha juíz koletivu hodi halo julgamentu ba prosesu ne’ebé molok ne’e nia hola-parte sai hanesan juíz koletivu.
Jornalista: Natalino Costa
Editór: Xisto Freitas da Piedade
