DILI, 06 Maiu 2025 (TATOLI) – Primeiru-Ministru (PM), Xanana Gusmão, kongratula Asosiasaun Espoza Polísia Nasionál Timor-Leste (AESPNTL) ne’ebé selebra nia ezisténsia ba daruak ho Tema “Hamutuk Reforsa Amizade no Familiariadade iha AESPNTL”.
Primeiru-Ministru, Xanana Gusmão, hateten iha prosesu hothotu ba konsolidasaun instituisaun PNTL ne’ebé konsege hamriik to’o ohin loron hanesan instituisaun seguransa iha nasaun ne’e, konta mós ho apoiu husi membru hotu-hotu nia kaben ne’ebé halibur-an iha AESPNTL.
Nia dehan iha prosesu hothotu konsolida instituisaun PNTL, prosesu ne’e la fásil, enfrenta difikuldade, dezde inísiu hasoru obstákulu no nesesidade atu apreende beibeik, ezije esforsu no dedikasaun membru PNTL nian, liuliu husi espoza sira no família.
Xefe Governu ne’e konsidera katak estabilidade familiár nu’udár pilár fundamentál ida iha dezenvolvimentu no elementu PNTL iha importánsia boot liu, tanba presiza duni sente uluk estabilidade iha uma-laran hodi bele tranzmite estabilidade ne’e iha sosiedade.
PNTL dezempeña papél vitál iha manutensaun órden públika hodi garante katak ema hotu-hotu bele moris seguru no pasífika. Kompromisu seguransa públika no moris di’ak hothotu nian, ida-ne’e merese husi povu, respeitu ne’ebé profundu ba PNTL tomak.
“Ne’e duni hothotu ne’ebé akompaña serbisu ita-nia ajente sira husi sira-nia kaben feto ka husi sira la’en merese ami nu’udar povu respeita ne’ebé kle’an no konsiderasaun ne’ebé boot, la’ós tanba buka pozisaun ida nu’udar Polísa, maibé tanba imi-nia kondisaun familiár, imi mós hetan problema no difikuldade iha órgaun públika ne’ebé ezije kompromisu, dedikasaun no sakrifísiu”, Xanana hateten iha Sentru Konvensaun Dili, ohin.
Iha fatin hanesan, Komandante Jerál PNTL interinu, Komisáriu Polísia Pedro Belo, hateten AESPNTL iha papél importante tebes hodi fó apoiu ba PNTL. AESPNTL la’ós de’it hanesan feen ho la‘en ne’ebé fó apoiu ativu iha membru PNTL, maibé mós fó apoiu iha aspetu oioin hanesan apoia programa PNTL iha atividade sosiál, no mós atividade karitativa ba komunidade kbiit-la’ek, hasa’e kualidade rekursu umanu liuhusi edukasaun no saúde.
AESPNTL mós iha papél hodi haforsa solidariedade entre membru sira tantu iha ambiente familiár kuantu komunidade.
“AESPNTL iha papél ida vitál tebes hodi hamoris família ne’ebé armonia, komunidade ne’ebé seguru iha dezenvolvimentu nian”, Pedro Belo dehan.
Vise-Prezidente AESPNTL, Ticha Altrudes Valente Gonçalves, lembra katak AESPNTL harii iha 27 Abríl 2023, maski enfrente dezafiu no obstákulu oioin maibé mantein promove asosiasaun ne’e liuhusi atividade sosiál, edukasaun no kulturál.
Asosiasaun demonstra bá públiku katak nia eziste no eziste duni, prontu atu fó apoiu b instituisaun PNTL liuhousi atividade sira mak temi ona.
AESPNTL hetan legalidade iha 18 Outubru 2024, liuhusi Dekretu-Lei númeru 34/2024, Orgánika PNTL, iha artigu 62 deskreve papél AESPNTL hanesan parseira institusionál apoia tarefa sira hodi valoriza familiár no materiál relasiona ho apoiu moris di’ak PNTL nian.
Jornalista: Arminda Fonseca
Editora: Maria Auxiliadora
