DILI, 06 Maiu 2025 (TATOLI)—Vise Primeiru-Ministru no Ministru Koordenadór Asuntu Sosiál, Mariano Assanami Sabino, dehan tempu badak Governu Timor-Leste sei halo akordu ho Ospitál Darwin-Austrália hodi transfere pasiente sira bá halo tratamentu iha-ne’ebá.
“Iha tempu badak sei halo akordu ho Ospitál Darwin. Daudaun ne’e iha ona prosesu nia laran atu haruka pasiente sira bá,” Mariano dehan ba jornalista sira, iha salaun Komisaun Nasionál Eleisaun (CNE-sigla portugés), tersa ne’e.
Iha fatin hanesan, Ministra Saúde Elia dos Reis, afirma Ospitál Darwin Austrália ho Governu Timor-Leste halo ona kooperasaun no prosesu sira daudaun ne’e la’o hela, liuliu prenxe rekizitu sira.
“Ita hatene katak ita halo kooperasaun ho Governu Austrália liuliu bá Ospitál Darwin nian, tanba ne’e prosesu sei la’o hela. Bainhira ita prenxe rekizitu sira-ne’e hotu ami sei informa ba ita-boot sira kona-ba asinatura akordu,” nia esplika.
Antes ne’e, Xefe Unidade Kardiolojia iha Hospital Nacional Guido Valadares (HNGV), Herculano Seixas dos Santos, relata espesialista kardiovaskulár Austrália hamutuk ho espesialista timoroan halo tratamentu ba pasiente kardiovaskulár na’in-35 iha HNGV, fulan kotuk.
Herculano Seixas haktuir katak kardiólogu sira mai halo avaliasaun ba pasiente sira ho kondisaun grave ne’ebé presiza intervensaun hanesan hala’o semináriu kona-ba planu estratéjiku ba saúde kardiovaskulár no diskute kona-ba planu atu kria sosiedade kardiolojia iha Timor-Leste.
Tuir espesialista ne’e, ekipa halo hela avaliasaun ba pasiente sira nune’e bele transfere ba Austrália hodi kontinua halo operasaun ba pasiente sira ho kondisaun saúde ne’ebé grave.
“Ami iha kazu 22 ne’ebé lista atu kontinua diskute ho ekipa iha Austrália, molok konfirma operasaun iha Austrália,” Herculano konklui.
Jornalista: Felicidade Ximenes
Editór: Xisto Freitas da Piedade
