DILI, 02 Maiu 2025 (TATOLI)–Prezidente Parlamentu Nasionál (PPN), Maria Fernanda Lay, destaka importánsia lian portugés nu’udar janela ba mundu.
“Importánsia língua hanesan janela para o mundo é a verdade,” PPN hato’o relasiona ho komemorasaun loron mundiál Portugés ne’ebé sei komemora iha 05 Maiu.
Iha loron ne’e Parlamentu Nasionál (PN) sei realiza atividade hanesan aprezentasaun poesia ho portugés husi estudante sira ho atividade seluk tan.
“Ami sei lori sira mai iha Parlamentu, labarik sira-nia entusiazmu atu apreende língua portugeza ho ezisténsia eskola CAFE no Rui Cinaty eskola portuguesa ne’e iha vantajen di’ak tebes, ha’u kontente tanba importánsia da língua hanesan janela para o mundo é a verdade, bainhira ita sai husi Timor ita to’o iha Bali ema la ko’alia ona tetum, ema ko’alia inglés no portugés,” nia akresenta.
Notísia relevante : PM Xanana prefere hakerek livru iha lian Tétun-Portugés
PPN antes ne’e hato’o iha reuniaun Asembleia Parlamentár CPLP kona-ba importánsia língua portugeza nu’udar janela mundu.
“Ha’u hateten iha enserramentu Asembleia Parlamentu, ita-nia ne’e sei eziste iha g7+ la’ós ko’alia portugés no inglés de’it maibé franses mós iha ne’ebá, ne mak Deputadu ida hatene mais ke uma língua, para deputadu ida-ne’e bele hanesan janela ba mundu hodi artikula ho ema polítikamente, ekonomikamente saida de’it ha’u bele ko’alia ho ema tanba hatene língua la’ós deskriminasaun maibé dever,” nia hateten.
Deputada husi Bankada Frente Revolucionária de Timor-Leste Independente (FRETILIN), Lídia Martins, konsidera língua portugeza sai nu’udar identidade Timor-Leste ho istória ne’ebé iha no sai hanesan língua ofisiál Timor-Leste nian ho tétum. Nia husu mídia atu kontinua promove língua portugeza liuhusi divulgasaun informasaun.
Deputadu Bankada Congresso Nacional de Reconstrução de Timor (CNRT), Gabriel Soares, kontinua enkoraja timoroan sira atu apreende língua portugeza no husu Governu liuhusi ministériu kompetente atu kontinua promove lingua portugés iha prosesu ensinu aprendizajen.
Jornalista : Nelson de Sousa
Editora : Julia Chatarina
