VIKEKE, 07 Maiu 2025 (TATOLI)–Ponte Eutua ne’ebé lokaliza iha suku Dilór, postu Lakluta, munisípiu Vikeke ne’ebé kotu foin lalais ne’e, empeza Zyah Fast Unipesoál, Lda, hamutuk ho komunidade no autoridade lokál halo ona normalizasaun ba ponte ne’e.
Notísia Relevante: Ponte Eutua ligasaun Lakluta ba Vikeke Vila kotu
xefe suku Dilór, Jacinto Ximenes, hateten ponte Eutua kotu ne’e empreza no komunidade apoia servisu nune’e halo ona normalizasaun provizóriu ba ponte referida atu fasilita movimentu entre postu no munisípiu.
“Ponte Eutua iha Dilór ne’ebé foin lalais kotu ne’e, empreza lori ekipamentu pezadu hanesan eskavatór no komunidade, juventude no ami autoridade lokál apoia servisu hodi halo normaliza, durante loron ida-nian hafoin finaliza ponte,” Xefe suku Dilór ne’e hateten ba Agência TATOLI, iha Dilór, ohin.
Daudaun ne’e, nia dehan, movimentu transporte hanesan karreta no motorizada la’o ba mai la’o di’ak fila-fali ona, maibé foin lalais kotu transporte hotu-hotu labele asesu Estrada ne’e.
“Maske normaliza no fasilita ona transporte sira, maibé normalzia ida-ne’e ita halo provizóriu de’it. Tempu udan-boot mai bele estraga tán tanba ita ateru ho rai de’it,” nia hateten.
Ni dehan, presiza halo konstrusaun foun ba ponte sira-ne’e atu nune’e tempu udan ponte labele kotu hodi labele difikulta povu sira iha postu administrativu Lakluta.
“Ha’u husu ba Governu tau atensaun ba ponte no estrada sira-ne’ebé liga mai ami-nia postu, hodi tau ba projetu. Labele halo normalizasaun hela de’it, la kle’ur aat fila-fali no sei difikulta povu atu movimenta ba-mai entre ba Vikeke Vila ba Lakluta no husi Lakluta ba Vikeke Vila, nia dehan.
Antes ne’e, ponte Eutua Dilór kotu iha loron sábadu (03 Maiu 2025) maizumenus tuku 17h00 lorokraik ne’ebé afeta husi udan-boot, no iha biban ne’ebá Diretór Servisu Obra Públika Munisípiu Vikeke (SOPMV) koordena kedas ho empreza Zyah Fast Unipesoál, Lda, hodi halo normalizasaun ba ponte ne’e.
Jornalista : Vitorino Lopes da Costa
Editór : Cancio Ximenes
