DILI, 07 Maiu 2025 (TATOLI)—Uniaun Europeia (UE) no País Afrikanu Lian Portugés no Timor-Leste (PALOP-TL) selebra Loron Mundiál Lian Portugés iha Maputu, destaka forsa parseria no kooperasaun ida entre UE no PALOP-TL, konsidera lian ne’ebé ko’alia barak-liu iha mundu.
Notísia Relevante: PR Horta husu dezenvolve lingua Portugeza hanesan dalen tetun
Tuir nota ne’ebé Tatoli asesu husi UE haktuir katak, forsa husi parseria ida-ne’ebé harii liu dékada tolu, entre CPLP ho UE, hahú husi tinan 1992, kooperasaun ne’e promove ona governasaun di’ak, dezenvolvimentu sustentável no valorizasaun husi kultura no lian komún.
“Iha loron ida-ne’e, ita selebra lian ida-ne’ebé ko’alia barak liu iha planeta, moris, múltiplu no inventa fali loron-loron hosi lia-na’in portugés liu millaun 260. Ohin, ita selebra no fó lian ba multiplisidade lian sira-ne’ebé forma nia no ne’ebé konstitui ninia rikusoin boot liu,” refere nota imprensa ne’e.
Parseria UE ho PALOP-TL haree lian portugés hanesan ferramenta serbisu nian, hodi halibur no projeta identidade oioin no selebra rezultadu sira-ne’ebé hetan liuhosi implementasaun projetu sira-ne’ebé sira dezenvolve hamutuk no ne’ebé promove no valoriza lian portugés.
Iha siklu finanseiru atuál UE nian, liuhosi Instrumentu Viziñu, Dezenvolvimentu no Kooperasaun Internasionál—Europa Globál (NDICI–Europa Global (021-2027), no uza metodolojia inovadora sira no kooperasaun Súl-ba-Súl, parseria estratéjiku ida-ne’e foka nia serbisu iha área prioridade tolu: governasaun, ekonómiku no finanseiru, hametin ukun kultura no empregu no empregu.
Selebrasaun Loron Lian Portugés nian hanesan mós omenajen ida ba kompromisu PALOP-TL no UE nian ba lian ida-ne’ebé moris, komún ne’ebé hamosu oportunidade sira-ne’ebé fahe.
Tuir komunikadu, Enkontru Ministeriál ba dala 15 entre PALOP-TL ho UE sei hala’o iha Díli, entre loron 04 no 06 Juñu 2025, ne’ebé sei sai hanesan kompromisu ida “Hari’i Futuru: Parseria ho UE no konsolidasaun Grupu PALOP-TL” no sei sai hanesan pasu ida tan hodi hametin lasu sira hosi transformasaun ne’e.
Jornalista : Hortencio Sanchez
Editór : Cancio Ximenes
