DILI, 07 Maiu 2025 (TATOLI)—Jurista Alexandre Corte-Real, hateten, tuir loloos, Juiza Dezembragadora Maria Natércia G. Ferreira, hatama pedidu kontestasaun Providénsia Kautelár ba Parlamentu Nasionál (PN), la’ós hato’o pedidu petisaun bá fali Prezidente Repúblika (PR) liga ho nomeasaun Prezidente Tribunál Rekursu, Afonso Carmona.
Tuir nia katak hato’o pedidu kontestasaun ba Parlamentu hodi sita bankada lima ne’ebé mak agora daudaun tuur hetan asentu iha Parlamentu Nasionál hodi husu sira-nia responsablidade tanbasá mak halo alterasaun no aprovasaun ba Lei Organizasaun Judisiária. Tanba, husi alterasaun ne’e mak Prezidente Repúblika uza nia kompeténsia tuir Konstituisaun artigu 86 ne’ebé nomea juíz Afonso Carmona ba Prezidente Tribunál Rekursu.
“Ha’u hanoin ita tenke haree didi’ak pedidu kontestasaun Maria Natércia nian ne’e. Ha’u bele dehan iha dalan bele kestiona, maibé kontestasaun ne’e tuir loloos ba Parlamentu Nasionál, maibé la’ós mai fali iha li’ur liuliu kontesta fali Prezidente Repúblika nia desizaun, ne’e laloos, tanba ita tenke haree problema ne’e nia hun maihusi ne’ebé. Tuir ha’u-nia hatene maihusi Lei Organizasaun Judisiária ne’ebé fó biban ba Prezidente Repúblika nomea juíz segunda klase ba kargu Prezidente Tribunál Rekursu,” Alexandre Corte-Real hateten ba TATOLI iha nia kna’ar fatin, UNTL, Kaikoli, kuarta ne’e.
Notísia relevante: Juiza Maria Natércia hatama petisaun bá Tribunál Dili kontesta desizaun PR ba Nomeasaun PTR Afonso Carmona
Nia esplika, hanesan sidadaun kuandu la kokorda kestaun ruma tenke hatama petisaun bainhira konsidera prosesu la tuir norma no prosedimentu.
Tuir Alexandre Corte-Real katak Lei Organizasaun Judisiária ida antigu ne’e só ema ne’ebé tuur ona juíz iha Supremu Tribunál Justisa mak bele bá sai Prezidente Tribunál Rekursu, maibé lei ne’e kaduka tiha ona.
“Nomeasaun ne’e konstitusionál, tanba Prezidente Repúblika halo nia kna’ar hodi nomea Prezidente Tribunál Rekursu ne’e ho baze Konstituisaun tanba Konstituisaun hateten nia mak iha kompeténsia atu nomea Prezidente Tribunál. Dala ida tan ha’u dehan katak atu Prezidente Repúblika ne’e konstitusionál, la’ós inkonstitusionál,” nia subliña.
Jornalista: Natalino Costa
Editór: Xisto Freitas da Piedade
