DILI, 09 Maiu 2025 (TATOLI) – Autoridade Munisipál Dili (AMD) halo kooperasaun servisu ho governasaun urbana liuhusi UCCLA (União das Cidades Capitais da Língua Portuguesa) no Uniaun Europeia (UA) hodi implementa programa haat hanesan, kria formasaun, halo reabilitasaun ba eskola ensinu báziku, jardin no mós memoriál Santa Kruz.
“Ita servisu hamutuk ho UCCLA ho embaixada Portugál halo formasaun língua portugeza, gratuitamente, ho objetivu atu mellora entidade Estadu, joven sira liuliu ba funsionáriu públiku sira bele aprende lian portugés”, PAM interinu hanesan mós Diretór Jerál Dezentralizasaun Governasaun Lokál, António Agosto Guterres informa ba jornalista TATOLI iha AMD, Matadoru, Dili.
Nia reforsa, tanba lian portugés ne’e hanesan mós ita-nia lian ona (lian ofisiál) – konsagra iha Konstituisaun RDTL artigu 13.o, entaun oportunidade loke formasaun ida-ne’e, nune’e formasaun ne’e loke iha sentru formasaun Dili ne’ebé lokaliza iha resintu autoridade munisípiu Dili nia fatin.
“Kooperasaun ida-ne’e ninia finansiamentu ne’e apoiu husi Uniaun Europeia, konsege harii balkaun úniku ida no entrega ba Governu sentrál, ne’ebé foin daudaun iha loron 04 fulan-Abríl ne’e halo lansamentu”, PAM interinu ne’e hateten.
Notísia relevante:Governu inaugura sentru atendimentu balkaun úniku iha Dili
Aleinde kria formasaun, autoridade interinu munisípiu Dili ne’e akrasenta katak iha mós reabilitasaun eskola ensinu báziku ida iha Hudi-Laran, ne’e mós hetan finansiamentu husi UE ne’ebé entrega ba UCCLA servisu hamutuk ho AMD hodi implementa projetu ne’e.
“No, daudaun ne’e mós halo hela konstrusaun ba jardin iha Maloa, no ida fali mak halo memória Santa Kruz ne’ebé antes ne’e sesante PAM inísia ona”, autoridade ne’e haktuir.
Enkuantu projetu memoriál iha Santa Kruz nian ne’e mós iha faze prosesu nia laran. “Ida-ne’e mak ita-nia kooperasaun servisu ho governasaun urbana UCCLA no Uniaun Europeia”.
“Kona-ba montante ba projetu no programa hirak-ne’e ida-ne’e la’ós kompeténsia ami-nia atu define ninia númeru tanba ida-ne’e kompeténsia husi Ministériu Finansas no mós iha Uniaun Europeia mak iha kompeténsia tanba ami hanesan implementadór ba projetu hirak-ne’e”, nia hatutan.
Entretantu, kooperasaun ida-ne’e durante tina ida hahú husi tinan-2025 to’o 2026, maibé bainhira iha planu atu kontinua halo kooperasaun, entaun projetu hira-ne’ebé mak la konsege ramata sei tau apropriadu fali ba kooperasaun tuirmai.
Jornalista: Alexandra da Costa
Editór: Rafael Ximenes de A. Belo
