OEKUSI, 09 Maiu 2025 (TATOLI) – Ministru Justisa (MJ), Sérgio de Jesus Fernandes da Costa Hornai, sesta ne’e, hala’o vizita ofisiál ba eskola tolu, iha sub-rejiaun Pante Makasar Rejiaun Administrativa Espesiál Oekusi Ambeno (RAEOA) atu observa direita aplikasaun kona-ba Edukasaun Multi Lingua (EMuLi) ba estudante sira.
Eskola tolu ne’ebé vizita mak hanesan, Eskola Bázika Filiál (EBF) Boboloa iha suku Bobokase, EBF 28 de Agostu iha Santa-Roza no EBF Um de Maiu Palaban. Iha ámbitu vizita supreza ne’e, Ministru Justisa konserva no fó teste ba alunu sira, kona-ba oinsa atu lee, hakerek no sura.
Notísia relevante:ME fasilita formasaun EMuLi ba eskola EPE no EB 41 iha Oekusi
“Mensajen importante, mak ne’e, ita presiza lee barak, nune’e ita bele deskobre mundu, tanba ita ko’alia ba pedagojika, siénsia no edukasaun, ita tenke iha leitura ida kle’an, entaun tenke hahú kedas husi kraik ensinu báziku sira, nune’e lori ita-nia labarik sira iha ábitu ida, tenke lori livru iha fatin ne’ebé de’it, kuandu iha tempu bele lee, tanba lee mak odamatan atu koñese mundu,” Ministru Justisa ba jornalista sira iha Oekusi, ohin.
Governante ne’e dehan jestu lee ne’e nu’udar prátika ida, atu kontribui mai ita atu iha vizaun futuru, ita hakarak loron mundiál ba livru, importante liu ita atu oriénta liuhusi Ministra Edukasaun, hanesan kampañia nasionál ida, katak iha fatin ne’ebé de’it, tenke hatoman aan atu lee ba doutrinade sira, siénsia sira importante iha livru, atu lori ita-nia koñesimentu ne’ebé di’ak.
“Ida-ne’e mak bele influénsia ita nia alunu sira iha ensinu báziku, nune’e sira bele iha vontade leitura ba iha livru sira-ne’ebé providénsia ona husi Governu,” nia katak.
Notísia relevante:Garante kualidade apredizajen, Edukasaun Oekusi kontinua implementa programa EMuLi
Iha biban ne’e, Diretór Edukasaun Oekusi, Vincencio Cono, relata katak programa Edukasaun Multi Lingua aplika ona iha eskola 41 ho maneira, hanorin uluk ho lian inan ka baiqueno depois mak introdús ba tetun no portugés.
“Ha’u agradese ba vizita ofisiál ne’e, tanba bele enkora alunu no profesór sira, atu kontinua hala’o kna’ar sai di’ak liutan, tanba programa EMuLi ne’e, atu tulun oan sira atu komprende ho lalais liuliu hakerek, lee no sura,” nia orgullu.
Notísia relevante:Implementasaun programa EMuLi halo estudante ko’alia portugés ho di’ak
Jornalista: Abílio Elo Nini
Editór: Florencio Miranda Ximenes
