DILI, 06 Maiu 2025 (TATOLI)—Jurista Alexandre Corte-Real sujere Prokuradór Jerál Repúblika (PJR) foun tenke brani no iha integridade nune’e bele aselera kazu krime korrupasaun sira.
“Ha’u hanoin Prokuradór Jerál Repúblika foun mai ne’e tenke brani no iha integridade. Maski nia hili husi podér polítiku sira maibé nia mós tenke iha kompromisu atu brani foti desizaun no integridade,” Alexandre hateten ba Tatoli iha kampus UNTL, Kaikoli, tersa ne’e.
Nia mós propoin ba Prokuradór Jerál Repúblika foun mai tenke haforsa formasaun ba Prokuradór sira liuliu iha área investigasaun sira inklui promosaun karreira ba prokuradór sira nune’e bele iha balansu iha prestasaun servisu sira.
Notísia relevante: PJR Alfonso Lopez kontinua asumi kargu
Tan ne’e, husu ba Xefe Estadu José Ramos Horta atu aselera nomeasaun ba Prokuradór Jerál Repúblika foun tanba Prokuradór Jerál Repúblika atuál nia mandatu hotu ona, nune’e bele kondús prosesu servisu Ministeriu Públiku ho di’ak liután.
Rekorda fali katak mandatu Prokuradór Jerál Repúblika, Alfonso Lopez, sei termina iha loron 29 fulan-Abríl 2025.
Tuir Konstituisaun RDTL artigu 86 kona-ba Prezidente Repúblika nia kompeténsia ba órgaun sira seluk iha alínea K deskreve katak Prezidente Repúblika nia kompeténsia ida mak foti Prokuradór Jerál Repúblika nian hodi hala’o kna’ar iha tinan haat nia laran. No, artigu 133 husi Konstituisaun RDTL ne’ebé ko’alia kona-ba Prokuradór Jerál Repúblika nia iha alínea 3 fundamenta katak Prezidente Repúblika mak hatudu Prokuradór Jerál Repúblika nian ba mandatu tinan haat, nu’udár lei hateten.
Jornalista: Natalino Costa
Editór: Xisto Freitas da Piedade
