DILI, 12 Maiu 2025 (TATOLI)—Diretór Kontrolu Kualidade Institutu Nasionál Farmaséutiku no Produtu Médiku (INFPM), Miguel Soares, hateten hahú husi Janeiru-Maiu tinan ne’e, INFPM sosa ona item ai-moruk hamutuk 403 husi Austrália, Indonézia no Índia liuhosi prosesu aprovizionamentu.
“Kona-ba prosesu kompra iha tinan 2025, tuir dadus ne’ebé rekollidu ona, INFPM sosa ona item ai-moruk hamutuk 403 liuhusi prosesu aprovizionamentu,” Miguel Soares ba jornalista sira iha nia kna’ar fatin, Kampung Alor, segunda ne’e.
Nia esplika, husi item ai-moruk 403 ne’e sosa ona ho orsamentu 2025 ho valór millaun $13.
“Prosesu sosa ai-moruk agora daudaun la’o hela. Tuir pagamentu husi Diretór Aprovizionamentu, ne’e hatudu katak husi totál alokasaun orsamentu ba tinan 2025 bá kompra medikamentu ho valor millaun $13. Ita uza ona 37% no 63% oras ne’e daudaun sei iha hela prosesu aprovizionamentu nia laran,” nia hateten.
Entretantu, estoke ai-moruk agora daudaun iha armazein INFPM hamutuk 82% no estoke out hamutuk 18%.
“Agora daudaun ne’e estoke out 18%. Ne’e bele dehan standard. Estoke out ne’e akontese tanba sirkulasaun sasán médiku sira-ne’ebe tama-sai iha armazein loron-loron. Ida ne’e tanba loron-loron ami atende pedidu husi kada sentru saúde sira. Tanba ne’e, ohin estoke out 18% no aban estoke out ne’e bele aumenta ka tun,” Miguel esklarese.
Diretór ne’e hatutan katak INFPM sempre garante estoke out ai-moruk iha armazein la to’o liu 40%, tanba ida-ne’e bele sai situasaun emerjénsia.
Jornalista: Felicidade Ximenes
Editór: Xisto Freitas da Piedade
