DILI, 12 Maiu 2025 (TATOLI) – Parlamentu Nasionál (PN) ratifika akordu entre Governu Timor-Leste (TL) no Laos relativu ba izensaun vistu ba fin turístiku ba titulár pasaporte komún nian.
“Rezultadu votasaun a favór 41, kontra 0 no abstensaun 0”, Prezidente Parlamentu Nasionál Nasionál, Maria Fernanda Lay, fó sai iha sala plenária, ohin.
Proposta akordu ne’e aprezenta husi Governu, ne’ebé konsiente relasaun di’ak amizade no kooperasaun entre nasaun rua, no mós konta ho roteiru ba adezaun hanesan membru plenu Timor-Leste ba ASEAN reflete espesifikamente nesesidade rekuiñesimentu mútuu pasaporte komún entre Estadu-Membru organizasaun nian.
Konsidera dezeju aprofunda mós relasaun ezistente no fasilita interkámbiu turístiku ba parte sira liuhusi rekoñesimentu resíproku pasaporte komún no konsesaun izensaun vistu ba ninia titulár hodi entrada no estadia to’o loron 30.
Konsidera determinasaun Timor-Leste atu implementa no kumpre instrumentu sira hotu husi ASEAN no konsidera kompeténsia eskluziva PN hodi ratifika akordu internasionál, nune’e Governu aprezenta ba PN tuir alínea a) iha númeru 2 artigu 115 Konstituisaun.
Reuniaun plenária ne’e marka prezensa husi Vise-Ministra ba Asuntu ASEAN, Milena Rangel.
Lembra katak Governu aprova, iha 08 janeiru 2025, akordu izensaun vistu ho Repúblika Demokrátika Populár Laos.
Notísia relevante: Timor-Leste no Laos asina akordu izensaun vistu ba pasaporte servisu-diplomátiku
Jornalista: Nelson de Sousa
Editora: Maria Auxiladora
