DILI, 12 Maiu 2025 (TATOLI)—Prezidente Tribunál Rekursu (PTR), Afonso Carmona, komprometidu katak durante nia mandatu sei aselera instalasaun Supremu Tribunál Justisa (STJ).
“Ha’u-nia diskursu ha’u hateten katak instalasaun Supremu Tribunál Justisa sei hala’o iha tempu badak. Agora daudaun ita prepara hela kondisaun liuliu dezeñu no rekursu umanu sé mak atu bá túr iha ne’ebá,” Carmona hateten ba jornalista sira bainhira partisipa semináriu ba progresu implementasaun lei númeru: 6/2023 kona-ba joven no labarik iha perigu ne’ebé hala’o iha Sentru Formasaun Jurídika Judisiária, Kaikoli, segunda ne’e.
Nia dehan, kona-ba obra instalasaun Supremu Tribunál Justisa, Governu kontatu ona parte Trubunál Rekursu atu ko’alia kona-ba prosesu dezeñu ba Supremu Tribunál Justisa.
“Ha’u foin tama semana rua liubá, maibé Governu kontatu ona ami atu bá ko’alia kona-ba dezeñu Supremu Tribunál Justisa. Tanba dezeñu ba Supremu Tribunál Justisa antes ne’e iha ona maibé agora ita ho Governu diskute fali,” nia tenik.
Carmona dehan, nia sei harii obra referida tanba fáz-parte hosi ninia kompromisu durante nia mandatu.
Nia esplika, orsamentu ba instalasaun Supremu Tribunál Justisa seidauk bele ko’alia, tanba Tribunál Rekursu hamutuk ho Governu sei diskute hodi haree prosesu dezeñu ba instalasaun Supremu Tribunál Justisa.
“Ita sei seidauk to’o bá iha orsamentu tanba ha’u hanoin sei iha planeamentu nia laran. Orsida Governu sei konvoka enkontru ho ami ko’alia kona-ba ida-ne’e, liuliu ba dezeñu Supremu Tribunál Justisa,” nia konklui.
Jornalista: Natalino Costa
Editór: Xisto Freitas da Piedade
