DILI, 13 Maiu 2025 (TATOLI) – Arsebispu Metropolitana Dioseze Dili, Dom. Virgílio Kardeál do Carmo da Silva hato’o, antes atu fila fali mai Timor-Leste (TL), hodi povu no igreja TL husik hela mensajen ba Papa Leão-XIV katak nafatin reza ba Papa no la mesak tanba timoroan sira sempre hamutuk ho Papa. Aleinde ne’e, husu mós ba Papa atu reza ba povu no nasaun TL.
“Ha’u kongratula ba amu Papa lori ita hotu nia naran iha loron segunda ne’e ha’u dehan ba nia katak ita-boot la mesak; igreja no povu Timór hanesan ami hadomi Papa Francisco. Ami mós hadomi ita-boot no reza ba ita-boot”, Arsebispu Metropolitana Dioseze Dili, Dom. Virgílio Kardeál do Carmo da Silva informa ba jornalista sira iha salaun VIP Aeroportu Nicolau Lobato Dili, ohin.
Tanba, tuir arsebispu, ita hotu hatene katak, antes ne’e iha vizitasaun Amu Papa Francisco nian iha Timor-Leste fó mensajen mai ita hotu atu tau-matan ba juventude sira tanba sira mak jerasaun foun ba nasaun ne’e.
Notísia relevante:Vizita Sua Santidade Papa Francisco mai timor hela ho memória
No, nia mós husu ba Papa Leão-XIV atu reza ba povu Timór liuliu reza ba iha foinsa’e sira. “Ida-ne’e mak mensajen dahuluk bainhira hala’o enkontru dahuluk ho amu Papa foun no husu mós ba amu Papa foun promete katak ita Timor hanesan ita-nia domin ba amu papa Francisco ita nafatin reza mós ba Papa Leão-XIV. Nia mós hamnasa no simu ha’u-nia mensajen ne’e ho kontente”, lidér Katólika timoroan ne’e haktuir.
Arsebispu Metropolitana Dioseze Dili, Dom. Virgílio Kardeál do Carmo da Silva mós husu ba timoroan sira atu nafatin reza ba Papa foun Leão-XIV, tanba ninia mensajen mai ita kona-ba paz tanba Papa ne’ebé mai ho vizaun ne’ebé klaru loos, atu kontinua buat ne’ebé Papa Francisco halo tiha ona.
“Nune’e iha ninia fuan, ha’u husu espesiál ba joven sira atu nune’e timoroan sira liuliu foinsa’e sira hodi haka’as aan atu Papa nia mensajen ne’e bele monu nafatin iha ita-nia fuan hanesan nia soe mensajen ne’e ba mundu tomak”, nia fó hanoin.
Dom. Virgílio Kardeál do Carmo da Silva akresenta, atu mundu ne’ebé ohin nakfahe malu, maibé nia lakole hahú fila-fali buat ne’ebé Papa Francisco husik hela ona hanesan pás no nia louva foin daudaun akontesimentu funu entre Pakistaun ho Índia, iha ninia misa anjelu foindauk Domingu ne’e nia louva hodi hamate diferensa sira-ne’e hotu no buka povu ne’ebé harii dame.
“Kontinua apela ba rai sira-ne’ebé seidauk harii dame nune’e hakarak hateten mós ba ita Timór, reza nafatin ba pás no husu mós ba ita hotu atu iha ita-nia rai mós ita haka’as aan hodi hametin liután mensajen ne’ebé amu Papa Francisco mai kuda ona iha Timor,” nia fó hanoin tan.
Notísia relevante:Misa inaugurasaun ba Papa Leão XIV selebra iha 18 Maiu iha Vatikanu
Jornalista: Alexandra da Costa
Editór: Rafael Ximenes de A. Belo
