PJR Nelson komprometidu prioriza rekursu umanu no remunerasaun prokuradór
DILI, 13 Maiu 2025 (TATOLI)–Prokuradór Jerál Repúblika (PJR), Nelson de Carvalho, komprometidu katak durante nia mandatu sei fó prioridade hodi aumenta rekursu iha Ministériu Públiku no hadi’a remunerasaun prokuradór sira, Ofisiál Ministériu Públiku (MP) nune’e sira bele presta servisu ho kualidade.
“Hanesan ohin iha ha’u-nia deskursu ha’u foka ba aumentu rekursu umanu iha Ministeriu Públiku tanba agora daudaun ami menus rekursu umanu aliás prokuradór la sufisiente. Ba futuru presiza halo tan rekrutamentu estraordinariamente ba rekursu umanu,” Nelson hateten ba jornalista sira hafoin simu pose husi Prezidente Repúblika, José Ramos Horta, iha Palásiu Prezidénsia Repúblika, Bairru-Pite, tersa ne’e.
Nia dehan, durante nia mandatu mós sei kria estatutu remuneratóriu ba prokuradór no ofisiál justisa. Estatutu ida-ne’e atu regula Majistradu Ministériu Públika no ofisiál justisa tanba sira mak ausiliár hodi servisu ba prokuradór sira.
Notísia relevante: Jurista Sergio Quintas la dúvida kapasidade Prokuradór Nelson de Carvalho
Nelson mós rekoñese katak daudaun ne’e krime sibernétika sai dezafiu boot tempu modernu no iha era dijitál ida-ne’e. Ho nune’e mak presiza eleva kapasidade prokuradór sira para bele atende kazu sira-ne’e.
PJR ne’e mós komprometidu kontinua fó prioridade atende kazu korrupasaun sira tanba Prokuradoria Jerál Repúblika daudaun ne’e iha gabinete ida kona-ba kombate kriminalidade.
Horta husu MP tuir prinsípiu legalidade
Iha fatin hanesan, Prezidente Repúblika, José Ramos Horta, husu ba Ministériu Públiku atu investiga kazu krime ruma tenke bazeia ba prinsípiu legalidade.
“Ministériu Públiku tenke bazeia ninia asaun sira iha kumprimentu rigorozu ba prinsípiu legalidade nian, prevene prosesu sira atu kaduka tanba inasaun no hasees-an hosi lori bá julgamentu kazu sira-ne ebé ninia absolvisaun previzível dezde inísiu,” Xefe Estadu hato’o apelu ne’e liuhusi nia intervensaun iha serimónia pose ba Prokuradór Jerál Repúblika foun, Nelson de Carvalho.
Horta hateten Konstituisaun Repúblika Demokrátika Timor-Leste define Ministériu Públiku nu’udár órgaun proativu sistema judisiál nian, responsável atu reprezenta Estadu, ezerse asaun kriminál, proteje menór sira, auzente sira no ema sira-ne’ebé laiha kbiit ne’ebé hotu-hotu partikularmente vulnerável, nune’e mós defende legalidade demokrátika no promove kumprimentu ba lei.
“Ministériu Públiku, bainhira atua, tenke halo bazeia ba prinsípiu legalidade, objetividade, imparsialidade no respeitu ba lei. Iha sentidu ida-ne’e, la aseitável atu atua ho maneira sektária, liuliu iha relasaun ho setór polítiku sira, ho persegisaun polítika ba setór sira ne’ebé de’it,” nia afirma.
Jornalista: Natalino Costa
Editór: Xisto Freitas da Piedade
