DILI, 14 Maiu 2025 (TATOLI)—Prezidente Repúblika, José Ramos Horta, hateten hanesan Xefe Estadu nia fó konfiansa tomak ba Tribunál Rekursu (TR) atu halo fiskalizasaun abstrata ba Lei Organizasaun Judisiária ne’ebé bankada opozisaun FRETILIN no Partidu Libertasaun Populár (PLP) submete foin lalais liubá.
Horta husu ba Tribunál Rekursu tenke halo servisu ho di’ak no evita konflitu interese ba kestaun sira hanesan ne’e.
“Ne’e Tribunál Rekursu mak tenke haree no sira hatene labele iha konflitu interese,” Horta hateten ba jornlista sira hafoin partisipa serimónia aniversáriu ezisténsia Polísia Sientífika Investigasaun Kriminál ba dala XI ne’ebé hala’o iha salaun Multiozu Bebora, kuarta ne’e.
Nia esplika nomeasaun Prezidente Tribunál Rekursu no Prokuradór Jerál Repúblika ne’e kompeténsia husi Prezidente Repúblika bazeia ba Konstituisaun.
Notísia relevante: Bankada opozisaun submete alterasaun Lei Organizasaun Judisiária ba TR atu halo Fiskalizasaun Abstrata
“Ha’u laiha partidu polítiku ida, maibé balun hakarak dudu ha’u ba ne’ebá. Ha’u la’o tuir lei, la’o tuir konxiénsia. Pur-ezemplu, se ha’u sadere karik ba partidu ruma, ha’u kuandu eleitu iha 2022 ha’u disolve kedas Parlamentu Nasionál hodi hakat ba eleisaun antesipada, maibé ha’u dehan lae. Ha’u tane Governu bele halo servisu. Ida-ne’e mak ha’u halo. Agora dún ha’u partidu CNRT, laiha buat ida. Kondisaun mak nune’e, ita rona de’it,” nia afirma.
Jornalista: Natalino Costa
Editór: Xisto Freitas da Piedade
