DILI, 14 Maiu 2025 (TATOLI)—Prezidente Tribunál Rekursu (PTR), Afonso Carmona, hateten nia seidauk simu pedidu rezignasaun husi Carmelita Moniz nu’udár membru efetivu Konsellu Superiór Majistratura Judisiária (KSMJ).
“Ha’u seidauk simu. Iha duni mídia hateten katak Carmelita Moniz aprezenta ona ninia rezignasaun hanesan membru Konsellu Majistratura Judisiária maibé ba kestaun ne’e seidauk to’o bá ha’u. Ne’ebé, ha’u seidauk bele dehan ida-ne’e,” Carmona hateten ba jornalista Tatoli iha Palásiu Prezidensiál, Bairru-Pite, tersa ne’e.
Notísia relevante: Carmelita Moniz rezigna-an husi membru Konsellu Superiór Majistratura Judisiál
Nia dehan, kuandu karta rezignasaun husi Carmelita mak to’o ona iha nia liman sei pronúnsia ba públiku.
Rekorda fali katak Carmelita Moniz reprezenta Parlamentu Nasionál nu’udár membru efetivu iha Konsellu Superiór Majistratura Judisiária. Iha tersa ne’e, 13 Maiu, Prezidente Parlamentu Nasionál ,Maria Fernanda Lay, anúnsia iha sesaun Plenaria Parlamentu Nasionál katak Carmelita Caitano Moniz aprezenta ona karta rezignasaun nu’udár membru efetivu Konsellu Superiór Majistratura Judisiária.
Jornalista: Natalino Costa
Editór: Xisto Freitas da Piedade
