DILI, 15 Maiu 2025 (TATOLI)—Jurista Sergio Quintas konsidera pedidu Providénsia Kautelár Inominada ne’ebé Juiza Maria Natércia aprezenta no pedidu fiskalizasaun abstrata ne’ebé bankada opozisaun FRETILIN no Partidu Libertasaun Populár (PLP) aprezenta foin dadaun ne’e nu’udár lisaun foun ba entidade Estadu hodi eduka sosiedade Timor-Leste.
Nia esplika katak atu ne’e nu’udár lisaun ba entidade Estadu tanba kuandu entidade nasaun nian atu halo nomeasaun tenke kumpri prosedimentu legál no administrativu.
“Iha norma konstitusionál admite buat ida-ne’e. Fiskalizasaun abstrata ne’e ho intensaun karik iha irregularidade ruma, sira bele halo pedidu ba Tribunal Rekursu hodi halo fiskalizasaun abstrata,” Sergio Quintas hateten ba TATOLI iha Tribunál Judisiál Primeira Instánsia Dili, Kaikoli, kinta ne’e.
Quintas informa katak matéria fiskalizasaun abstrata ne’e sei haree husi Juíz Konsileiru sira ne’ebé hanesan mós juíz primeira klase.
“Sira na’in-hira ne’ebé túr iha-ne’ebá (Tribunál Rekursu) ne’e mesak Juíz Konsileiru de’it ka juíz primeira klase,” nia haktuir.
Notísia relevante: PDHJ sei husu fiskalizasaun abstrata ba alterasaun Lei Organizasaun Judisiária
Quintas sujere, atu rezolve kestaun konflitu interese iha Tribunál Rekursu, mak Prezidente Tribunál Rekursu presiza hasai diretiva ida para nomea juíz segunda klase ne’ebé laiha konflitu interese hodi haree lisuk matéria ida-ne’e (fiskalizasaun abstrata) hodi julga.
“Situasaun ne’e akontese dezde tempu UNTAET mai to’o agora. Kuandu juíz iha Tribunál Rekursu impedidu, Prezidente Tribunál hasai diretiva husu Juíz Tribunál Judisiál Primeira Instánsia bele hola-parte iha Plenária Tribunál Rekursu hodi foti desizaun,” nia tenik.
Quintas afirma katak Tribunál Rekursu mak órgaun aas liu hodi fiskaliza kualker atu iha rai ida-ne’e, labele dehan ida-ne’e la bazeia ba lei.
Pedidu Providénsia Kautelár Inominada no fiskalizasaun abstrata ne’e ligadu ho artigu 76A alínea 2 iha alterasaun Lei Organizasaun Judisiária ne’ebé fó kompeténsia ba Prezidente Repúblika hodi nomea Prezidente Tribunál Rekursu no artigu 124 alínea 3 Konstituisaun RDTL ne’ebé sai baze ba nomeasaun.
Jornalista: Natalino Costa
Editór: Xisto Freitas da Piedade
