DILI, 20 Maiu 2025 (TATOLI) – Iha 20 Maiu, Loron Restaurasaun Independénsia Timor-Leste nian ba da-23, Governu mós marka istória ida hodi halo lansamentu fatuk dahuluk ba dezenvolvimentu no espansaun Aeroportu Internasionál Prezidente Nicolau Lobato, Komoro.
Serimónia tau fatuk dahuluk ne’e sei realiza iha área VIP aeroportu Komoro, Dili, ne’ebé lidera husi Primeiru-Ministru, Ministru, Xanana Gusmão, no parte interesada sira.
Tuir ajenda ne’ebé Tatoli asesu, atividade serimónia kulturál sei hahú iha tuku 14h00 no eventu prinsipál sira komesa iha tuku 15h30-16h00 ba leten hanesan hahú rejistu ba bainaka sira, kanta inu nasionál, dansa kulturál, aprezentasaun vídeo.
Sei iha liafuan makloke husi Ministru Transporte no Komunikasaun, Miguel Manetelu, no diskursu husi Primeiru-Ministru, Xanana Gusmão.
Depoizde ne’e tama ba iha serimónia importante mak lansa fatuk dahuluk ba dezenvolvimentu no espansaun aeroportu Dili.
Lembra katak antes ne’e iha loron 14 Maiu 2025, Ministériu Transporte no Komunikasaun, Miguel Manetelu, informa ona iha reuniaun Konsellu Ministru katak iha 20 Maiu halo lansamentu ba primeira pedra ba konstrusaun aeroportu.
Ba konstrusaun aeroportu ne’e, Governu deside ona prosedimentu aprovizionamentu liuhusi prosesu naruk, ne’ebé empreza manán-na’in iha rua mak hanesan PT. Waskita Karya husi Indonézia, liuhusi parseria ho PT Amtyhas mak kaer espansaun pista no infraestrutura ho totál orsamentu millaun $72,5 no jestaun projetu ho verba millaun $6,28.
Aleinde ne’e empreza husi Japaun ne’ebé konstrui terminál pasajeiru ho orsamentu besik millaun $37,5, ne’ebé verba ne’e prevee husi Governu Timor-Leste no husi povu japonés.
Notísia relevante: Governu aprova konseitu ba projetu Aeroportu Internasionál Nicolau Lobato
Jornalista: Arminda Fonseca
Editora: Maria Auxiliadora
