DILI, 20 Maiu 2025 (TATOLI)—Prezidente Repúblika (PR), José Ramos Horta, hateten to’o agora Prezidénsia Repúblika seidauk dekreta lista indultu ba rekluzu sira iha ámbitu Komemorasaun Restaurasaun Independénsia RDTL ba dala XXIII, 20 Maiu, tinan ne’e.
“Ha’u hateten sériu duni. Ha’u la bosok. To’o agora ha’u seidauk haree lista,” Horta hateten ba jornalista sira iha Palásiu Prezidensiál, Bairru-Pité, tersa ne’e.
Nia dehan, kuandu nia simu ona lista ne’e sei dekreta no pronúnsia ba públiku. “Sim, kuandu lista ne’e mai, ha’u túr haree ha’u despaxa kedas. Agora ha’u seidauk hateten buat ida. Posibilidade aban mak ha’u foin haree,” nia afirma.
Konfirma kona-ba lista indultu Padre Richard Dasbach, Xefe Estadu la komenta buat ruma kona-ba kestaun ne’e.
“Ha’u seidauk haree buat ne’e. Ita-boot sira mak inventa buat ne’e. Bainhira ha’u haree tiha lista mak ha’u foin fó ha’u-nia opiniaun,” nia konklui.
Jornalista: Natalino Costa
Editór: Xisto Freitas da Piedade
