AACTL no ANATL preparadu simu bainaka auditoria seguransa husi ICAO
DILI, 23 Mei 2025 (TATOLI) — Órgaun prinsipál rua komposta husi Autoridade Aviasaun Sivíl Timor-Leste (AACTL, sigla portugés) no Administrasaun Navegasaun Aérrea Timor-Leste (ANATL), daudaun hatudu prontidaun halo esforsu maka’as hodi simu auditoria seguransa husi Organizasaun Internasionál Aviasaun Sivíl (ICAO, sigla inglés) ba Aeroportu Internasionál Prezidente Nicolau Lobato (AIPNL), Dili.
Tuir planu auditoria seguransa ne’e sei hala’o iha loron 26 fulan-Maiu to’o loron 04 fulan Juñu tinan 2025 no hanesan momentu importante ida iha esforsu sira nasaun nian hodi hametin sistema seguransa no seguransa aviasaun nasionál.
Prezidente Konsellu Administrativu Autoridade Aviasaun Sivíl Timor-Leste (AACTL), Zezinho António Gusmão, hateten, preparasaun husi AACTL no ANATL to’o ona iha faze finál atu simu auditoria seguransa.
“Iha loron rua oin mai ita sei simu simu ekipa ida husi ICAO. Ami prontu atu simu auditoria seguransa ida-ne’e, tanba preparasaun atinje ona purvolta 90%. Ami mós estabelese ona koordenasaun besik ho ANATL hodi forma ekipa servisu hamutuk hodi simu prosesu auditoria ida-ne’e,” Zezinho hafoin tomada pose nu’udar Prezidente AACTL iha Ministériu Transporte no Komunikasaun, sesta ne’e.
Tuir nia, komunikasaun entre AACTL no ANATL la’o ho di’ak, kolaborativu no garante katak sei laiha obstákulu signifikativu iha AIPNL tanba buat hotu ajusta ona ba padraun seguransa ICAO nian.
Nia esplika, garante buat hotu la’o di’ak tanba hetan apoia téknika gratuita husi Prosivu Austrália, ne’ebé ajuda tebes hodi garante prontidaun tékniku nian.
“Ami agradese tebes ba sira-nia apoiu no ami preparadu tomak hodi garante katak kumpri padraun sira seguransa aviasaun nian. Auditoria ICAO ida-ne’e ho objetivu atu avalia jestaun seguransa aeroportu nian, inklui protesaun ba pasajeiru sira, bagajen no aviaun. Aspetu hotu-hotu husi sistema seguransa nian sei hetan verifikasaun hodi asegura katak laiha ameasa ba seguransa voo nian,” nia dehan.
Auditoria ICAO ida ne’e hanesan parte ida husi inisiativa globál ida atu garante katak estadu membru hotu-hotu, inklui Timor-Leste, iha kapasidade atu implementa ho konsistente padraun seguransa aviasaun nian.
Auditoria ne’e mós sei halibur ekipa ICAO nian hamutuk ho órgaun prinsipál rua aviasaun sivíl nian iha Timor-Leste, mak hanesan AACTL no ANATL, ne’ebé sai nu’udar reguladór no operadór ba aeroportu ne’e.
Pasu ida-ne’e la’ós de’it hametin Timor-Leste nia pozisaun nu’udar estadu membru ICAO, maibé hatudu mós governu nia seriedade hodi hasa’e kualidade no seguransa setór aviasaun nasionál.
Antes Ne’e, Prezidente Konsellu Administrativu Administrasaun Navegasaun Aérrea Timor-Leste (ANATL), Romualdo António Soares da Silva, hateten, sira-nia parte kontrata ona kompañia lokál Devita Group hodi hahú halo reabilitasaun iha AIPNL dezde fulan Janeiru tinan ne’e nu’udar parte integrál ba preparasaun ba auditoria.
Reabilitasaun referida foka ba terminál departure, kedatangan (arrival), no área sira hanesan dezeñu interiór, sistema ar-kondisionadu, no aparénsia kuartu nian hodi tuir padraun VIP nian.
ICAO nu’udar Organizasaun Internasionál ba Aviasaun Sivíl, hanesan ajénsia Nasaun Unida nian ne’ebé estabelese padraun no regulamentu ba aviasaun sivíl internasionál, ho objetivu atu garante seguransa, efisiénsia no regularidade transporte aéreu nian.
Notísia relevante: Ministru Miguel fó pose ba membru foun Konsellu Administrasaun ACCTL
Jornalista : Arminda Fonseca
Editór : Evaristo Soares Martins
