Jerasaun Patriota iha esperansa veteranu sira bele iha unidade
DILI, 23 Maiu 2025 (TATOLI)–Jerasaun Patriota, Hermínio Xavier, ninia esperansa ba veteranu sira atu iha unidade ba malu hodi hamutuk dezenvolve nasaun, nune’e bele lori moris di’ak ba povu hodi hasai husi kiak no mukit.
“Ami hakarak nasaun ne’e moris iha estabilidade no pás. Ami no públiku nia espetativa katak, ami-nia aman veteranu sira tenke unidade,” nia hato’o iha salaun Ministériu Defeza, Fatuhada, Sesta ne’e.
Nia rekoñese, veteranu sira bele iha difénsia ideolojia, polítika no partidu maibé sira mak forma nasaun ne’e.
“Sira mak hahú no sira mak kontinua la’o, ami hakarak sira sai espellu ba sosiedade, tanba sira halo funu ho prinsípiu ida katak Timor tenke ukun-an, katak ema hotu tenke hetan moris di’ak,” nia akresenta.
Notísia relevante : Kompleta tinan 10: Jerasaun Patriota realiza reflesaun husi pasadu ba futuru
Hermínio Xavier nota, tinan 23 Timor-Leste restaura indepedénsia maibé nasaun kontinua hasoru dezáfiu balun.
“Ida-ne’e hanesan serbisu uma ida nian ba aman veteranu sira, liuliu aman sira ne’ebé kaer ukun, ida-ne’e mak ami-nia esperansa hakarak moris dame aman sira tenke hamutuk, labele haketak malu,” nia hato’o.
Jerasaun Patriota dehan, aman nasaun sira bele hatudu ida-idak nia karater no jestu ne’ebé diferente, maibé nafatin iha esperansa katak sira sei hamutuk nafatin.
Jornalista : Nelson de Sousa
Editora : Julia Chatarina
